وزیراعظم محمد شہباز شریف تون قومی احتساب بیورو نا چیئرمین نا اوڑدہی

اسلام آباد۔ 27 جنوری (اے پی پی) وزیراعظم محمد شہباز شریف قومی احتساب بیورو نا کسبی آجوئی و قومی وسیلہ غاتا رکھ انا اونا مشن نا مخ تفی نا درشانیءِ کرسا نیب انا کارکڑد ناستاءِ کرینے۔ وزیراعظم محمد شہباز شریف تون چیئرمین قومی احتساب بیورو (نیب) لیفٹیننٹ جنرل (ر) نذیر احمد سے شنبے نادے آ داڑے وزیراعظم ہاؤس اٹی اوڑدہی کرے ہراٹی او وزیراعظم ءِ نیب انا سالانہ رپورٹ سال 2025 ء پیش کرے۔ نائب وزیراعظم و وزیرخارجہ اسحاق ڈار ہم اوڑدہی ٹی ساڑی ئسک۔ وزیراعظم آفس نا میڈیا ونگ انا کنڈآن جاری بیان ن رداٹ وزیراعظم نیب انا کارکڑد نا باضابطہ جاچ ءِ ہلک ونیب ءِ اسہ ٹیکنالوجی نا بنداو آ چلینگوک آ ادارہ غاتیٹی بدل کننگ نا ستاءِ کرے۔ وزیراعظم پوسکن آ ٹیکنالوجی تا انضمام خاص کر مصنوعی ذہانت نا کمک اٹ جاست وپاست نا ستاءِ کرے۔ اونیب انا ای۔ آفس فریم ورک انا ہم ستاءِ کرے ہرا حکومت نا گیشتر کفایت شعاری و شفافیت نا ہدف آتون ہم گرنچ ءِ۔ وزیراعظم نیب انا السی خذمت آتا کنڈآ چکار نا ہم ستاءِ کرے۔ وزیراعظم نیب انا کسبی آجوئی و قومی وسیلہ غاتا رکھ نا اونا مشن نا مخ تفی نا حکومتی عزم انا درشانی ء ِ کرے۔ چیئرمین نیب وزیراعظم ءِ حوال ترسا پارے کہ تدوک آسال نیب 6.213ٹریلین روپئی نا ریکوری نا ہرا اسہ ریکارڈ اسے۔ چیئرمین نیب وزیراعظم ءِ 2.98 ملین ایکڑ ریاست و جنگلات آتا ڈغار ءِ دُوارہ دوئی کننگ نا بابت ہم معلومدار کرے ہرانا نہاد کم و ود 5.99 ٹریلین روپئی ءِ۔ اوپارے کہ جعلی و فراڈ ہاؤسنگ و انویسٹمنٹ سکیم تا 115،587 زہمی تے 180 بلین روپئی پدی ترفنگا ہرا کہ اسہ ہندن ءُ قومی خذمت اسے ہرا ڑآن لس بندغ نا پت بحال مس ۔ چیئرمین نیب پارے کہ نیب’’کھلی کچہری‘‘ و ’’سینٹرل کمپلینٹ سیل‘‘ سرسہبی اٹ ریاست و اونا شاری تا نیام اٹ فاصلہ غاتے چٹفینے و داہیت ءِ پک کرینے کہ بیورو خلیفنگ نا جاگہ غا غاوتا چٹفنگ نا وسیلہ جوڑ مرے۔