پاک چین شریداری پت و مریس مدی کمکاری نا چیدہ، ہڑتوم آملک آتا تعلقداری پوسکن آ بڑزی تیا سرمننگ ءِ، بنجائی وزیر پیٹرولیم علی پرویز ملک

اسلام آباد۔ 28 جنوری (اے پی پی) بنجائی وزیر پیٹرولیم علی پرویز ملک پارینے کہ پاک چین شریداری پت و مریس مدی کمکاری نا چیدہ ءِ، سی پیک نا رداٹ چینی زرکاری پاکستان ناتوانائی نا بشخ اٹی اہم کڑداداکرے ، کانڑکنی نا بشخ اٹی چین نا کمکاری آن شونداری نا پوسکن ءُ کسر ملنگک۔ ہڑتوم آملک آتا تعلقداری پوسکن آ بڑزی تیا سرمننگ ءِ، اسیجائی مائننگ ڈٹ آتیان توانائی رکھ و روزگار نا وارخواہی ودی مس، پاکستان و چین نانیام اٹ منرل نا بشخ اٹی کمکاری اہمیت تخک۔ داخیال آتا درشانیءِ او چارشنبے نادے آداڑے پاک چین منرلز کمکاری فورم آن تران کرساکرے۔ وزیر پیٹرولیم پارے کہ پاک چین سفارتی تعلقداری نا 75 می سال دے نا وخت آ دافورم اٹی بشخ ہلنگ کنکن اعزاز اسے، ہڑتوم آملک آک تدوک آ منہ دہائی تیٹی مُر ہُننگ، تین پہ تینی پت و مریس مدی کمکاری آ تالان سوگو و سوگو شریداری قائم کرے ہراٹی خاص کر ساڑی آ سال تیٹی پاکستان نا زرگزران نا چندی بشخ آتیٹی پبی و نمان اثرات مون آ بس۔ بنجائی وزیرپارے کہ چین پاکستان اقتصادی راہداری (سی پیک) نا رداٹ چینی زرکاری توانائی نا گیشتر ڈٹ آتا کمک اٹ پاکستان نا بجلی ودی کننگ نا لائخی ٹی ترندی اٹ ودکی کننگ اٹ اہم کڑد اد اکرے ہراڑآن پاکستان ءِ زرگزرانی شونداری ٹی مون تروک متکن آ ویل، خاص کر توانائی نا کمتی نا مون ءِ توننگ، ماس ٹرانزٹ سلوشن، پوسکن سڑک آتا نیٹ ورک و الیکٹرک موبیلیٹی گام گیج آتیٹی پبی کمک رسینگا ہرانانتیجہ ٹی نئے بیرہ پاکستان نا پیداواری لائخی ٹی ودکی مس بلکن روزگار نا گیشتر وارخواہی ہم ودی مس۔ اوپارے کہ چین دا بنائی ملک آتیٹی اوار ئس ہرامعدنیات نا بشخ انا پاکستان نا اسٹریٹجک اہمیت ءِ امنا کرے، چین نئے بیرہ نایاب ارضی  بلکن کریٹیکل منرلز، کاپر، سمیلٹنگ و ریفائننگ اٹی جہانی کہول آ نمان حیثیت تخک، سیندک کاپر گوڈ و دودر ڈٹ پاک چین مائننگ کمکاری نا سرسہب درور آک ءُ۔