بنجائی وزیر ڈاکٹر مصدق ملک نا سائی ٹیک ڈپلُوہب انا سی ای او تون اوڑدہی

اسلام آباد۔ 28 جنوری (اے پی پی) بنجائی وزیر موسمیاتی بدلی و چاگڑدی ہم گرنچی ڈاکٹر مصدق ملک سائی ٹیک ڈپلُو ہب انا چیف ایگزیکٹیو آفیسر الیکسس روئگ تون اوڑدہی کرے ہراٹی موسمیاتی گام گیج آتیکن سائنس و سفارت کاری نا تین پہ تینی انضمام ءِ سوگو کننگ آ گپ وتران کننگا۔ داوخت آ بنجائی وزیر الیکسس روئگ و سائی ٹیک ڈپلُو ہب انا کنڈآن سائنس و سفارتکاری نا گچین امتزاج کن کروک آپیش رفت نا ستاءِ کرے۔ چارشنبے نادے آ وزارتِ موسمیاتی بدلی و چاگڑدی ہم گرنچی آن جاری بیان نارداٹ ڈاکٹر مصدق ملک پارے کہ ساڑی آ جہانی حالیت آتیٹی سائنس و سفارتکاری نا تین پہ تینی رابطہ اسہ جہانی گرج اسے وخت اس کہ موسمیاتی بدلی نا سوب مون تروک زرگزرانی و راجی زور انا رداٹ داپاکستان کن خاص وڑاٹ اہمیت تخک ۔ اوڑدہی ٹی پاکستان نا ہندی علمی وسیلہ ، پٹ وپولی لائخی و پٹ وپولی پنجر غان گچین فائدہ غاتیا زور شاغنگا و شاہدی تیا تالان پالیسی سازی نا اہمیت ءِ تالان کننگا۔ دارداٹ ہیلکاری و فیلوشپ پروگرام تا تیاری ، بشمول سائنسدان تے سرکاری وزارت آتیٹی تعینات کننگ نا گمان تیا ہم سرجمی اٹ سجفنگا تانکہ پالیسی سازی نا عمل ءِ سوگو کننگ مرے۔ فریق آک دا ہیت آ امنا کریر کہ اسہ ہفتہ نا تہہ ٹی آخبت نا کمکاری کن اسہ جوان ءُ روڈ میپ اس اسیجائی وڑاٹ تیار کننگک ۔ سلاہ ئی روڈمیپ اٹی اے جی سی و کم و ود 100 پی ایچ ڈی کہول انا موسمیاتی چاہندار آتے متحرک کننگ، مالی وسیلہ غاتا فراوانی و پائیدار سائنسی سلابتی نظام نا جوڑ کننگ آ چکار کننگک۔ اوڑدہی ٹی بڑزکو تعلیمی کمیشن (ایچ ای سی) ، گلوبل چینج امپیکٹ اسٹڈیز سینٹر (جی سی آئی ایس سی) ، جامعہ ، قومی پٹ وپولی ہند و وزارت خارجہ نا نمائندہ غاتون اوار اہم تعلقدار ادارہ غاتا نمائندہ غاک بشخ ہلکر۔