جان جوڑی حکومت یا ریاست نا اف مچ آ راج انا اسیجائی زمواری ءِ، بنجائی وزیر جان جوڑی

اسلام آباد۔ 28 جنوری (اے پی پی) بنجائی وزیر جان جوڑی سید مصطفیٰ کمال پارینے کہ جان جوڑی بیرہ حکومت یا ریاست نا زمواری اف بلکن ہربندغ، ہر بشخ و مچ آ راج انا اسیجائی زمواری ءِ۔ داخیا ل آتا درشانی ءِ او سلطانہ فاؤنڈیشن اٹی اڈ ہلوک دود آن تران کرسا پارے کہ اسہ ایماندار ڈاکٹر اسے نا آسودہی و انسانی خذمت آتیا تالان کاریم یقیناََ صدقہ جاریہ ءِ ہرادے اونا سنگت و شاگڑد آک اینو ہم برجاتخانو۔ اوپارے کہ جان جوڑی بیرہ حکومت یا ریاست نازمواری اف بلکن ہر بندغ، ہر بشخ و مچ آ راج انا اسیجائی زمواری ءِ۔ اوپارے کہ جان جوڑی اسہ نعمت اسے و اوڑآن بیدس انسان نئے تینا دینی زمواری تے گچین وڑاٹ ادا کننگ کیک و نئے دنیاوی زند ءِ جوان وڑاٹ تیر کننگ کیک۔ اوپارے کہ الائیڈ ہیلتھ سٹاف و نرس آک ناجوڑ تون غٹ آن زیات وخت ءِ تیرکیرہ وہنداسوب آن اوفتا ہمدردانہ رویہ ناجوڑ نا جان جوڑی ٹی اہم کڑد ادا کیک۔ اوزور شاغا کہ ناجوڑ تون جوان رویہ تخنگ ، نرمی اٹ ہیت کننگ واخلاق اٹ پیش بننگ ہندن ءُ گڑا ءُ ہرافتیا ہچ ءُ مالی خڑچ اس بفک ولے اوفتا اثر بھاز گہرامریک۔ اومستی پارے کہ جان جوڑی نا بشخ بیرہ اسہ نوکری اس اف بلکن اسہ خذمت ومشن اسے۔ اوپارے کہ حقی ہیلتھ کیئر بیرہ ہسپتال آتیٹی ناجوڑ آتا درمان اسکان محدود اف بلکن مخلوق ءِ ناجوڑی تیان بچفنگ ، آگاہی فراوان کننگ و رکھی تدابیر اختیار کننگ نا ترغیب تننگ نا پن ءِ۔ جان جوڑی اسہ اسیجائی انسانی ءُ ویل اسے و حکومت جان جوڑی ناآسراتی تا فراوانی ءِ پک کننگ کن گام گیج کننگ ءِ، ولے السی کمکاری و شعور آن بیدس دا مسخت پورو مننگ کپک۔