پاک چین متکن سنگتی و اقتصادی شریداری تین پہ تینی پت ، شرف و اسیجاشونداری نا وژن آ تالان ءِ، بنجائی وزیر قیصر احمد شیخ

اسلام آباد۔ 28 جنوری (ا ے پی پی) بنجائی وزیر بورڈ آف انویسٹمنٹ (بی اوآئی) قیصر احمد شیخ پاکستان وچین نا نیام اٹ متکن آ سنگتی و اقتصادی شریداری ءِ پین سوگو کننگ نا عزم انا درشانی ءِ کرساپارینے کہ ہڑتوم آملک آتا تعلقداری تین پہ تینی پت، شرف و اسیجاشونداری وژن آ تالان ءِ۔ داخیا ل آتا درشانی ءِ او چارشنبے نادے آ پاک چین منرل کوآپریشن فورم آن تران کرساکرے۔ اوپارے کہ پاکستان و چین آہنی سنگتی نا سوگو رشتہ ٹی تفوک ءُ، ہڑتوم آملک آتا تعلقداری تین پہ تینی پت، شرف و اسیجائی شونداری نا وژن آ تالان ءِ۔ اوپارے کہ ای جندی وڑاٹ چین نا بھلا شونداری نا مشاہدہ ءِ کریٹ ، داڑآن پاکستان خاص کر معدنیات، صنعت و زرکاری نا بشخ آتیٹی بھاز ہیل کننگ مریک۔ قیصر احمد شیخ پارے کہ پاک چین منرل کوآپریشن فورم ہڑتوم آملک آتا نیام اٹ معدنی وسیلہ غاتا بشخ اٹی کمکاری ءِ مون آ دننگ نا اہم کوشست ءِ ہرا تین پہ تینی شریداری ءِ پوسکن ءُ جہت اس ایتک۔ اوداہیت آ زور شاغا کہ پاکستان وچین نا نیام اٹ رابطہ وتعاملات آتیٹی پین ودکی بایدے رے تانکہ اسیجاشونداری نا وارخواہی تیان پبی فائدہ ہرفنگ مرے۔ بنجائی وزیرپارے کہ تدوک آ سال ’’ستمبر2025‘‘ اٹی 300 آن زیات پاکستانی کمپنی چین نا دورہ ءِ کریر وخت ا س کہ پاک چین بزنس ٹو بزنس کانفرنس اٹی 167ہمفاہمتی یات داشت (MoUs)آ دستخط کننگا ہرا ہڑتوم آملک آتا نیام اٹ ودوک آ واپاری و زرکاری تعلقداری تا پیدوار شاہدی ءِ۔ اوپارے کہ بورڈ آف انویسٹمنٹ غٹ دستخط مروک مفاہمتی یات داشت آتیا فعال وڑاٹ عملدرآمد کننگ ءِ و درملکی زرکارآتے ون ونڈو آسراتی نا رداٹ پبی کمک فراوان کننگ انگ ءِ، زرکاری نا چاگڑد ءِ پین گچین جوڑ کننگ کن ریگولیٹری اصلاحات آ کاریم ترندی اٹ برجاءِ تانکہ کاروبار اٹی آسانی ءِ پک کننگ مرے۔ بنجائی وزیر داعزم انا درشانی ءِ کرے کہ بورڈ آف انویسٹمنٹ پاکستان اٹ درملکی زرکاری نا مون آدننگ کن سنبرینگوک ءِ و پاک چین اقتصادی کمکاری ءِ پین ودفنگ کن غٹ ممکن گام گیج آتے برجاتخک۔