اِرا تُواٹی کوئٹہ شاراٹی ڈوہ انا کچ 70 درسد اسکان کم مس، وزیراعلیٰ بلوچستان میر سرفراز بگٹی

کوئٹہ۔ 28 جنوری (اے پی پی) وزیراعلیٰ بلوچستان میر سرفراز بگٹی پارینے کہ صوبائی حکومت نا گچین حکمت عملی و کانود نافذ کروک آ ادارہ غاتا سخت کوشست آتا سوب کوئٹہ شار اٹی امن و ایمنی نا حالیت آتیٹی نمان گچینی بس و ڈوہ انا کچ اٹی پیدوار کمتی ریکارڈ کننگا۔ راجی رابطہ نا ویب سائٹ ایکس آ گپ وتران کرسا وزیراعلیٰ پارے کہ تدوک آ اِرا تُو اٹی کوئٹہ شار اٹی ڈوہ انا کچ اٹی 70 درسد اسکان کمتی واقع مس ہرا داہیت انا شاہدی ءِ کہ حکومت نا کنڈآن کروک آ گام گیج آک سہی کنڈآ ہِننگ ءُ، شاری تا جان ومال انا رکھ ءِ پک کننگ کن پوسکن آ ٹیکنالوجی آن فائدہ ہرفنگ انگ ءِ۔ میر سرفراز بگٹی پارے کہ سیف سٹی کوئٹہ ڈٹ انا رداٹ خلوک آ 97 درسد کیمرہ غاتےدُوارہ فعال کننگانے ہراڑآن چاروکی نا نظام گچین و ڈوہ تا توننگ اٹ کمک ملنگ ءِ۔ وزیراعلیٰ پارے کہ بلوچستان اٹی امن وایمنی نا حالیت آتےپدریسہ ولے پائیدار بنداو آ گچین جوڑ کننگ کن گچین وسوگو گام گیج آک برجاءُ، دہشت گردی وکسبی ڈوہدار آتا برخلاف زیروٹالرنس پالیسی نا رداٹ بےپرخ کارروائی کننگ انگ ءِ۔ اوپارے کہ بلوچستان پولیس دہشت گردی وکسبی ڈوہدار آتا برخلاف ہراول دستہ نا کڑد ءِ ادا کننگ ءِ والس نا جان ومال انا رکھ اکن زمواری تے کسبی مہارت و قربانی نا جوزہ اتون پورو کننگ ءُ۔ وزیراعلیٰ میر سرفراز بگٹی داعزم انا درشانی ءِکرے کہ حکومت صوبہ ٹی پائیدار امن  اسکان کانود نافذ کروک آ ادارہ غاتا پور و سرپرستی ءِ برجاتخک و شاری تے اسہ رکھوک چاگڑد اس فراوان کننگ کن غٹ دوئی وسیلہ غاتے کاریم اٹ اتنگک۔