گوادر اٹی بڑزکو کہولی سیمینار و ایگزیبیشن ، گوادر ءِ جہانی واپاری ہند اس جوڑ کننگ نا عز م انا درشان، حکومت گوادر ءِ پوسکن آ انفراسٹرکچر، صنعت، واپار ، لاجسٹک و سیل و سوات نا ہند اس جوڑ کننگ کن سوگو حکمت عملی آ عمل کننگ ءِ، احسن اقبال

اسلام آباد۔ 28 جنوری (اے پی پی) گوادر اٹی سیمینار و ایگزیبیشن ’’گوادر پوسکن آ کرکی شار2026‘‘  اڈتننگا ہرانا مسخت گوادر ءِ اسہ پوسکن، پائیدار و جہانی آب انا کرکی و واپاری شار اسے نا وڑاٹ مون آ دننگ ئس۔ سیمینار اٹی ملکی و درملکی چاہندار، پالیسی ساز، زرکار، تعلیمی ادارہ غاتا نمائندگان و کاروباری شخصیت آک بشخ ہلکر۔ سیمینار نا مہمان خاص بنجائی وزیر ڈٹ بندی ، شونداری و خصوصی گام گیج پروفیسر ڈاکٹر احسن اقبال ئس۔ تینا خصوصی ترا ن اٹی اوگوادر بندرگاہ نا صنعتی و واپاری شونداری ءِ قومی اولیت گوندسا پارینے کہ گوادر داسہ بیرہ اسہ بندرگاہ اس اف بلکن پاکستان ءِ جہانی واپاری نظام تون گنڈوک آ اسہ اسٹریٹجک کسر اس جوڑمرسا ہِننگ ءِ۔ بنجائی وزیرپارے کہ حکومت گوادر ءِ پوسکن آ انفراسٹرکچر، صنعت، واپار ، لاجسٹک و سیل و سوات نا ہند جوڑ کننگ کن سوگو حکمت عملی آ عمل کننگ ءِ۔ اوداہیت آ زور شاغا کہ گوادر نا شونداری نا اصل مسخت ہندی آبادی ءِ روزگار ، تعلیم، جان جوڑی ، دِیر و بجلی کون آبنداوی آسراتی تا فراوانی ءِ تانکہ شونداری نا بھرمک لس شاری اسکان سرمننگ کیر۔ سیمینار اٹی پالیسی سازی، زرکاری نا وارخواہی، بندرگاہی سیکورٹی، علاقائی رابطہ، چاگڑد دوست شونداری وپائیدار شاری ڈٹ بندی کون آ اہم سرحال آتیا سرجمی اٹ گپ وتران کننگا۔ ترانکار آک داہیت آ امنا کریر کہ گوادر نا شونداری پاکستان نا زرگزرانی وتواجہی و برآمد آتا مون آ دننگ اٹ اہم کڑد ادا کیک۔ داوخت آ سینیٹر مشاہد حسین سید پارے کہ گوادر ڈیہہ اٹی واپار،بندرگاہی زرگزران و جہانی رابطہ کاری نا اسہ اسٹریٹجک ہند اس جوڑ مرسا مون آبننگ ءِ، ہرا نیامی ایشیا، دے ٹک نیامی و سویلی ایشیا ءِ تین پہ تین گنڈنگ نا پبی لائخی تخک ۔ منیجنگ ڈائریکٹر پاکستان ٹورازم ڈیولپمنٹ کارپوریشن (PTDC)آفتاب الرحمان رانا تینا تران اٹی گوادر نا سیل و سواتی گمان تے تالان کرسا پارے کہ کرکی سیل و سوات، دودوربیدہ ئی میرات و قدرتی زیبائی گوادر ءِ جہانی سیل و سواتی نقشہ غا نمان ہند اس ترفنگ نا لائخی تخک۔ ڈاکٹر محمد جمیل احمد پارے کہ گوادر پورٹ علاقائی واپار، لاجسٹک و ٹرانزٹ ٹریڈ انا ہند جوڑ مننگ نا پبی لائخی تخک، ہراڑآن پاکستان ءِ ڈیہہ اٹی واپاری برتری دوئی مننگ کیک۔ ڈاکٹر حسن داؤد بٹ گوادر نا صنعتی گمان واسپیشل اکنامک زون (SEZs)ءِ مون آ تخسا پارے کہ صنعتی زون تیٹی زرکاری آن روزگار نا پوسکن ءُ وارخواہی ودی مریک و برآمد آتیٹی نمان ودکی ممکن مریک۔ ڈین نسٹ یونیورسٹی ڈاکٹر اشفاق حسن خان تینا گپ وتران اٹی داہیت آ زور شاغاکہ گوادر نا شونداری ٹی ہندی آبادی نا راجی و زرگزرانی شونداری ءِ مرکزی حیثیت اس بایدے تننگے تانکہ پائیدار و ہمہ گیر شونداری ءِ پک کننگ مرے۔ سیمینار نا ایسر آ بشخ ہلوک آک گوادر سیمینار و ایگزیبیشن 2026 ءِ پاکستان نا قومی زرگزرانی شونداری، علاقائی رابطہ کاری و آخبت نا ڈٹ بندی کن اسہ اہم ءُ مزل اس گوندا ر و داعزم انا درشانی ءِ کریر کہ گوادر ءِ جہانی آب انا پوسکن کرکی شار اس جوڑ کننگ کن غٹ اسٹیک ہولڈرآک اسیجائی کوشست آتے برجاتخرہ۔