وزیراعلیٰ خیبرپختونخوا نا وادی تیراہ آپریشن نا بابت بیان راستی تیان چپ ءِ، ڈاکٹر طارق فضل چوہدری

اسلام آباد۔ 28 جنوری (اے پی پی) بنجائی وزیرپارلیمانی امور ڈاکٹر طارق فضل چوہدری پارینے کہ وزیراعلیٰ خیبرپختونخوا نا وادی تیراہ آپریشن نا بابت بیان راستی تیان چپ ، سیاسی فائدہ غاتیا تالان و الس ءِ ریفنگ نا اسہ بے سہبءُ کوشست اسے۔ چارشنبے نادے آایکس آ اسہ بیان اسے ٹی اوپارے کہ دہشت گردی کون آ سنگین قومی ویل ءِ سیاسی رنگ تننگ بھاز غیرزموارانہ و ریاستی فائدہ غاتا برخلاف ءِ۔ اوپارے کہ وادی تیراہ ٹی برجاگام گیج بندغ ، جماعت یا حکومت اسے نا برخلاف اف بلکن پاکستان نا امن، الس نا رکھ و دہشت گردی نا پورو چٹفنگ کن المی ءِ۔ داپاننگ کہ انٹیلی جنس بیسڈ آپریشن حکومت اسے بدنام کننگ یا چٹفنگ کن کننگ انگ ءِ ، اسہ خطرناک ءُ سیاسی بیانیہ سے ہرا دہشت گرد زموار آتے سوگوی تننگ کیک۔ اوپارے کہ حقیقت دادے کہ خیبرپختونخوا حکومت امن و ایمنی ٹی بے سہبی نشان تس و الس نا جان و مال انا رکھ اٹی غیرسنجیدہ ءُ رویہ اس تینا کرے۔ اگہ صوبائی حکومت وخت آ گچین گام گیج کریکہ تو اینو بنجاءِ سخت فیصلہ کروئی تمیتوکہ۔ دا دروغ و پروپیگنڈاسے کہ فیصلہ غاک بند کمرہ غاتیٹی کننگار۔ سیکورٹی نا بابت فیصلہ غاتے ریاستی ادارہ غاک راستی، انٹیلی جنس رپورٹس و الس نا رکھ ءِ مون آ تخسا کیرہ، نئے کہ سیاسی بیان آتا بنداو آ ۔ ہمپ و بٹ نا باندات آوزیراعلیٰ نا بیانیہ ہم گمراہ کن ءِ۔ ریاست زہمی تیکن بحالی، امداد و آسراتی تا جوان ءُ ڈٹ اس تیارکرینے وخت اس کہ صوبائی حکومت بیرہ سیاسی پوائنٹ سکورنگ اٹی اختہ ءِ۔ الس نا مشکلات آتے سیاست نا ایندھن جوڑ کننگ بھاز افسوزناک ءِ۔ دہشت گرد آتا برخلاف کارروائی گچین کاری مہم اس اف بلکن قومی سلامتی نا خواست ءِ۔ وزیراعلیٰ ءِ مرے کہ او ریاستی ادارہ غاتیا دوبہ خلنگ نا جاگہ غا الس نا رکھ اکن سنجیدہ گام گیج کے۔ اوپارے کہ پاکستان نا الس ءِ بشخنگ، ادارہ غاتے بدنام کننگ وریاستی فیصلہ غاتے جھیڑہ ئی جوڑ کننگ نا ہرکوشست بے سہب مریک، امن ، سلامتی و دہشت گردی نا چٹفنگ آ ہچ ءُ سمجھوتہ اس کننگپک۔