وزیراعظم محمد شہباز شریف نا پاکستان نا ڈیجیٹل و اقتصادی بدلی ءِ ترند تر کننگ کن جہانی مہارت خاص کر پیشن نا ملک پاکستانی تا شمولیت نا اہمیت آ زور

اسلام آباد۔ 27 جنوری (اے پی پی) وزیراعظم پاکستان محمد شہباز شریف ڈیجیٹل بدلی نا عمل ءِ ترند کننگ کن جہانی خاص کر پیشن نا ملک پاکستانی تا مہارت آن فائدہ ہرفنگ نا گرج آ زور شاغسا پارینے کہ حکومت قومی و اقتصادی شونداری کن پوسکن آ ٹیکنالوجی تے کاریم اٹ اتنگ کن اولیتی بنداو تیا گام گیج کننگ ءِ۔ وزیراعظم محمد شہباز شریف داخیال آتا درشانی ءِ تدوک آ ہفتہ برطانیہ نا غیرسرکاری دورہ ٹی مصنوعی ذہانت نا سرکڑدہ چاہندار آتا بڑزکو کہول ڈل اسے تون اوڑدہی ٹی کرے۔ وزیراعظم آفس نا میڈیا ونگ انا کنڈآن سے شنبے نادے آ جاری بیان نا رداٹ ڈل اٹی جہانی ادارہ و تنظیمک بشمول بلیک راک، یونیورسٹی آف کیمبرج، یونیورسٹی آف آکسفورڈ ، ڈیلویٹ و دنیا نا پنی آ مصنوعی ذہانت و ٹیکنالوجی کمپنی تا سینئر راہشونک اوار ئسر۔ اوڑدہی ٹی پاکستان ورچوئل ایسٹس ریگولیٹری اتھارٹی (پی وی اے آراے) نا چیئرمین بلال بن ثاقب ہم ساڑی ئس۔ ڈل اتون گپ وتران کرسا وزیراعظم پارے کہ حکومت قومی و اقتصادی شونداری کن پوسکن آ ٹیکنالوجی تیان فائدہ ہرفنگ کن اولیتی بنداو تیا کاریم کننگ ءِ۔ وزیراعظم پاکستان نا ڈیجیٹل و اقتصادی بدلی ءِ ترند تر کننگ کن جہانی مہارت خاص کر پیشن ناملک پاکستانی تا شمولیت نااہمیت آ زور شاغا۔ اوپارے کہ مصنوعی ذہانت کون آ مون آ بروک ٹیکنالوجیک قومی اولیت، ادارہ جاتی لائخی و جوان شونداری نا مسخت آتون ہم گرنچ بایدے مریر۔وزیراعظم پارے کہ حکومت السی خذمت آتا فراوانی ءِ گچین کننگ کن نجی بشخ اتون شریداری آ پبی کاریم کننگ ءِ۔ ڈل انا باسک آک پاکستان نا اہم چیلنج آتون مون تننگ کن مصنوعی ذہانت نا عملی کاریم اٹ اتنگ آ گپ وتران کرے۔ داوخت آ وزیر مملکت بلال بن ثاقب پارے کہ مصنوعی ذہانت پاکستان کن داسہ آخبت نا تصور اف بلکن ساڑی نا روشنا موقع ءِ و حکومت دا بابت پبی گام گیج کننگ ءِ۔ وزیراعظم تون ڈل انا اوڑدہی ڈیجیٹل بدلی، جدت طرازی نا شونداری و ٹیکنالوجی اٹ چلینگوک آ السی پالیسی نا مریس مدی وژن و جہانی سوچ تخوک آ ادارہ جاتی شریدار آتے اوار کننگ کن پاکستان نا گیشتر حکمت عملی نا عکاسی ءِ کیک۔