بنجائی وزیر پیٹرولیم علی پرویز ملک تون آسٹریلوی ہائی کمشنر ٹموتھی کین نا اوڑدہی

اسلام آباد۔ 27 جنوری (اے پی پی) بنجائی وزیر پیٹرولیم علی پرویز ملک تون پاکستان اٹی تعینات پوسکن آ آسٹریلوی ہائی کمشنر ٹموتھی کین اوڑدہی کرے ، ہراٹی کانڑ کنی و نہادی خل (جیم سٹونز) نا بشخ آتیٹی ہڑتو م آ کنڈآتا کمکاری ءِ مون آدننگ نا گمان تیا گپ وتران کننگا۔ ترجمان پیٹرولیم ڈویژن نا رداٹ بنجائی وزیر پاکستان نا کانڑ کنی نا بشخ اٹی آسٹریلوی کمپنی تا بھاز است خواہی نا خیرمقدم ءِ کرسا ملک اٹی ساڑی معدنی وسیلہ غاتا گیشتر ولے داسکان غیر استعمال شدہ لائخی خاص کر ٹیتھیان بیلٹ ءِ تالان کرے۔ اوکانڑکنی نا بشخ اٹی منظم و مریس مدی کمکاری نا مون آ دننگ کن پاکستان و آسٹریلیا نا نیام اٹ بین الحکومتی معاہدہ (آئی جی اے) نا گمان تا سلاہ ہم تس۔ علی پرویز ملک جیم سٹونز نا بشخ انا شونداری و اونا باضابطہ ٹہیفنگ کن حکومت پاکستان نا کوشست آتے مون آ تخا و پارے کہ دا بشخ برآمدات وروزگار نا وارخواہی ودی کننگ نا پبی لائخی تخک۔ آسٹریلوی ہائی کمشنر پارے کہ آسٹریلوی کمپنیک مہالو آ ن ہی ریکوڈک ڈٹ اٹی فعال وڑاٹ اوار ءُ وخت اس کہ پین آسٹریلوی کمپنیک ہم داڈٹ اٹی شمولیت اٹی بھاز است خواہی ظاہر کرینو۔ اومستی پارے کہ آسٹریلوی کمپنی تے پاکستان منرلز انویسٹمنٹ فورم (پی ایم آئی ایف) اٹی بشخ ہلنگ نا است بڈی ءِ کننگک و داوخت آ آسٹریلیا نا پبی نمائندگی نا اومیت ظاہر کرے۔ ہائی کمشنر توانائی گدریفنگ نا رداٹ تانبا و خیسن نا جہانی کہول آ ودوک آ اہمیت نا حوالہ ءِ ترسا پارے کہ پاکستان نا کانڑ کنی نا بشخ جہانی چکار دوئی کننگ ءِ۔ اوانٹرنیشنل مائننگ اینڈ ریسورسز کانفرنس (آئی ایم اے آرسی) ٹی بشخ ہلنگ کن تینا ساڑی آ دورہ آسٹریلیا نا ہم حوالہ ءِ تس ہراڑے پنی آ وجونیئر آسٹریلوی کانڑ کنی کمپنی تتون پاکستان نا معدنی بشخ اٹی زرکاری و کمکاری نا وارخواہی تیا فائدہ ئی گپ وتران مس۔ اوڑدہی ٹی ہڑتوم آ فریق آک تین پہ تینی فائدہ کن کانڑ کنی وجیم سٹونز نا بشخ آتیٹی پاکستان و آسٹریلیا نا نیام اٹ کمکاری ءِ پین سوگو کننگ نا عزم انا درشانی ءِ کریر۔