ملکی زرگزران مالی سال 2026 اٹی شونداری نا رفتار ءِ برقرار تخنگ کن جوان انگا پوزیشن اٹی ءِ، برجاتُو اٹی کبینی 5 آن 6 درسد نا حد اٹی سلک، وزارت خزانہ

اسلام آباد۔ 27 جنوری (اے پی پی) بنجائی وزارت خزانہ پارینے کہ ملکی زرگزران مالی سال 2026 اٹی شونداری نا رفتار ءِ برقرار تخنگ کن جوان انگا پوزیشن اٹی ءِ۔ جنوری 2026 ء ٹی کبینی 5 آن ہلیس 6 درسد نا حد اٹی سلک۔ داہیت ءِ وزارت خزانہ نا کنڈآن جاری ماہانہ اقتصادی اپ ڈیٹ رپورٹ اٹی پاننگانے۔ رپورٹ اٹی پاننگانے کہ بھلا صنعت آتاپیدوار وایلو زرگزرانی ٹک آتا است بڈ کارکڑدنا سوب آن مالی سال 2026 اٹی ملکی زرگزران شونداری نا رفتار ءِ برقرار تخنگ کن جوان انگا پوزیشن اٹی ءِ، دا مثبت رجحان محتاط پالیسی ، برجاپنجرجاتی اصلاحات و کبینی نا زور اٹی کمتی نا سوب مالیاتی حالیت آتیٹی نرمی نا اثرآتا عکاسی ءِ کننگ ءِ۔ رپورٹ نا رداٹ حسابات جاریہ نا کھاتہ نسخان اٹی مننگ نا گمان ءِ ولے زرراہی تس نا سوگو بننگ و آئی ٹی و خذمت آتا برآمد آتا سوگو کارکڑد نا سوب آن پیشن نا زر ءِ کم کننگ اٹ کمک رسینگک، گچین مالیاتی سمندرپار پاکستانی تا زرراہی تس نا کچ 19.33 ارب ڈالر ریکارڈ کننگا ہرا تدوک آمالی سال انا ہندا مد انا 17.84 ارب ڈالرنا مقابلہ ٹی 10.6 درسد زیات ءِ، اولیکو ششماہی ٹی برآمدات آتا کچ 15.5 ارب ڈالر ریکارڈ کننگا ہرا تدوک آمالی سال انا ہندا مد انا 16.3 ارب ڈالر نا مقابلہ ٹی 5 درسد کم ءُ، درآمد آتیا 31.3 ارب ڈالرزرمبادلہ خڑچ مس ہرا تدوک آ مالی سال انا ہندا مد انا 27.9 ارب ڈالر نا مقابلہ ٹی 12.3 درسد زیات ءُ۔ حسابات جاریہ نا کھاتہ غاتا نسخان 1.174 ارب ڈالر ریکارڈ کننگا، تدوک آ مالی سال انا اولیکو ششماہی ٹی حسابات جاریہ نا کھاتہ غاتا توازن 957 ملین ڈالر فاضل ئس، اولیکو ششماہی ٹی براہ راست پیشن نا زرکاری نا کچ 808.1 ملین ڈالر ریکارڈ کننگا ہرا تدوک آ مالی سال انا ہندا مد انا 1424.8ارب ڈالر نا مقابلہ ٹی 43.3 درسد کم ءُ۔ 16 جنوری 2026ء آ اسٹیٹ بینک انا زرمبادلہ نا کوڑی تا کچ 16.1 ارب ڈالر و کمرشل بینک آتا زرمبادلہ نا کوڑی تا کچ 5.2 ارب ڈالر ریکارڈ کننگا، تدوک آ سال 10 جنوری آ سٹیٹ بینک انا زرمبادلہ نا کوڑی تاکچ 11.4 ارب ڈالر و کمرشل بینک آتا زرمبادلہ نا کوڑی تا کچ 4.7 ارب ڈالر ریکارڈ کننگاسس۔ مالی سال انا اولیکو 6 تُو اٹی ایف بی آر نا محاصل نا کچ 6.160 ٹریلین روپئی ریکارڈ کننگا ہرا تدوک آ مالی سال انا ہند امد انا 5.624 ٹریلین روپئی نا مقابلہ ٹی 9.5 درسد زیات ءُ، نان خراج محصولات آتا کچ 3.581 ٹریلین روپئی ریکارڈ کننگا ہرا تدوک آ مالی سال انا ہندا مد انا 3.417 ٹریلین روپئی نا مقابلہ ٹی 4.8 درسد زیات ءُ۔