ضلع خیبرنا قبیلہ غاک یخ آتاموسم اٹی ہمپ و بٹ کرسا کرینو، کے پی حکومت نا ترجمان دا بابت بے بنداو بیان بازی تیٹی لگوک ءِ، عطاء اللہ تارڑ

اسلام آباد۔ 27 جنوری (اے پی پی) بنجائی وزیر حوالکاری و شینکاری عطاء اللہ تارڑ پارینے کہ ضلع خیبرنا قبیلہ غاک یخ آتا موسم اٹی ہمپ و بٹ کرسا کرینو، خیبرپختونخوا نا ترجمان دا بابت بے بنداو بیان بازی تیٹی لگوک ءِ۔ سے شنبے نادے آداڑے وزیر دفاع خواجہ آصف ، وزیراعظم نا کوآرڈی نیٹر حوالکاری خیبرپختونخوا اختیار ولی تون اوار پریس کانفرنس آن تران کرسا بنجائی وزیر حوالکاری پارے کہ خیبرنا آفریدی و اکاخیل قبیلہ ایلو قبیلہ غاتیان جتا ءِ، مستین گواہ ءِ کہ ضلع خیبر نا قبیلہ غاک یخ آتا موسم اٹی ہمپ و بٹ کرساکرینو، دا قبیلہ غاک باسنی تیٹی پدی تیراہ ناعلاقہ غاتیٹی بریرہ ، خیبرپختونخوا نا ترجمان دا بابت بے بنداو بیان بازی تیٹی لگوک ءِ۔ اوایڈورڈ اے مرفی نا کتاب ‘‘دی خیبر’’ نا حوالہ ءِ ترسا پارے کہ داکتاب 1899ء ٹی شینک مس ہراٹی آفیشل گزیٹیئر نا حوالہ ءِ تننگانے، داٹی 1880ء ٹی دا نوشتہ کننگانے کہ ہندا قبیلہ غاک یخ آتیٹی ہمپ و بٹ کیرہ۔ اوپارے کہ دا اسہ مسلمہ حقیقت اسے، جہانی کہول آ شینک مروک آ دا کتاب اٹی دانا باقاعدہ ذکر ارے، گزیٹیئر آن ننے پورو تاریخ ملک۔ اسہ سوج اسے نا ورندی ٹی بنجائی وزیرپارے کہ ہرا یخ مستین اٹی اکتوبر اٹی بناکریکہ، داسہ موسمی بدلی تا سوب اونادورانیہ بدل مسنے،  داوخت آ جنوری نا ایسر اٹی برف مننگ ءِ حالانکہ مستین اٹ نومبر اٹی برف مسکہ، موسمی حالیت آتیٹی دا بدلی کلائمیٹ چینج نا سوب مون آ بسنے۔ اوپارے  کہ موسم مون آہِننگ ءِ پوراسیز نل شفٹ ءِ۔ اوپارے کہ خیبرپختونخوا حکومت نا جاری کروک نوٹیفکیشن نا رداٹ خیبرنا قبیلہ منشاء اٹ ہِننگ ءُ۔