ورناک غٹ آن نہادی میرات، پی ایم لیپ ٹاپ اسکیم مچ آملک انا طالب علم آتے پوسکن تعلیم و ڈیجیٹل دنیا تون گنڈانے، بنجائی وزیر انجینئر امیر مقام

صوابی۔ 27 جنوری (اے پی پی) بنجائی وزیر امور کشمیر ، گلگت بلتستان و سیفران و صدر مسلم لیگ (ن) خیبرپختونخوا انجینئر امیر مقام پارینے  کہ وزیراعظم محمد شہباز شریف نا لیپ ٹاپ اسکیم مچ آملک خاص کر خیبرپختونخوا نا پسماندہ علاقہ غاتا طالب علم آتے پوسکن تعلیم و ڈیجیٹل دنیا تون گنڈانے، ورناک غٹ آن نہادی میرات ءُ۔ داخیال آتا درشانی ءِ او سے شنبے نادے آصوابی یونیورسٹی ٹی وزیراعظم لیپ ٹاپ اسکیم نا رداٹ طالب علم آتیٹی لیپ ٹاپ بشخنگ نا دود آن بطور مہمان خاص تران کرساکرے۔ انجینئر امیر مقام پارے کہ اینو صوابی یونیورسٹی ٹی نما غٹ انا نیام اٹ  برسا بھاز خوشی و گمر محسوس مننگ ءِ، دا ورناتا مچی اصل اٹ پاکستان نا روشنا آخبت نا ضمانت ءِ انتئے کہ ورناک ننا غٹ آن نہادی میرات ءُ و نم طالب علم آک داقوم انا آخبت آک اورے۔ اوپارے کہ ای غٹ آن مست وزیراعظم محمد شہباز شریف نا بصیرت افروز سرکڑدہ ئی ءِ خراج تحسین پیش کیوہ ہرا مدام ورناتے قومی شونداری نا وت جوڑ کرے، وزیراعظم نا لیپ ٹاپ اسکیم اسہ انقلابی ءُ گام اسے ہرامچ آملک خاص کر خیبرپختونخوا نا پدسلوک آ علاقہ غاتیٹی طالب علم آتے پوسکن تعلیم و ڈیجیٹل دنیا تون گنڈانے۔ بنجائی وزیرپارے کہ اینو صوابی یونیورسٹی نا 241 طالب علم دا اسکیم آن براہ راست فائدہ ہرفنگ ءُ ہرا داہیت انا شاہدی ءِ کہ بنجائی حکومت ورناتا آخبت کن سنجیدہ ءِ۔ اوپارے کہ او خصوصی وڑاٹ رانا مشہود احمد خان چیئرمین وزیراعظم یوتھ پروگرام ءِ ہم خراج تحسین پیش کیک ہرا دے و نن ورناتیکن روزگار، تعلیم، اسکالرشپ و کسبکاری نا وارخواہی ودی کننگ اٹ لگوک ءِ، پی ایم یوتھ پروگرام ملک انا لکھ آ ورناتے واکدار کرینے۔ انجینئر امیر مقام پارے کہ او فیلڈ مارشل و وزیراعظم پاکستان نا جیرت مندانہ سرکڑدہ ئی ءِ خراج تحسین پیش کیک ہرانا کماشی ٹی پاکستان بھارت ءِ شکست ترسا نئے بیرہ تینا دفاع ءِ ناقابل تسخیر جوڑ کرے بلکن دنیا ءِ دا کلہو تس کہ پاکستان اسہ سوگو، خوددار و پرامن ءُ ملک اسے ، داسرسہبی آن پد پاکستان نا جہانی ساکھ سوگو مس، جہانی کہول آ پاکستانی موقف ءِ پذیرائی ملا و نناسرسہب سفارتکاری پوسکن ءُ وارخواہی ودی کرے۔ بنجائی وزیر انجینئر امیر مقام پارے کہ صوابی یونیورسٹی کن بنجائی حکومت نا کنڈآن نمان گام گیج کننگانے، 2015 ٹی وزیراعظم محمد نواز شریف نا حکومت اٹی پی ایس ڈی پی نا رداٹ اِرا اکیڈمک بلاک آتا تفنگ نا ڈٹ 1001 ملین روپئی آن منظور کننگا، اسہ وار ولدا مسلم لیگ (ن) نا حکومت 2023 اٹی ہندا ڈٹ ءِ ودفسا پین 701 ملین روپئی فراوان کرے ہرا بنجائی حکومت نا تعلیمی عزم انا پیدوار شاہدی ءِ ، داکان بیدس ہونہار سکالرشپ آتا رداٹ صوابی یونیورسٹی نا 50 طالب علم فائدہ ہرفینو ہرا ستاکڑزوک ءُ گام اسے۔