بنجائی وزیر بورڈآف انویسٹمنٹ قیصر احمد شیخ نا فیصل آباد انڈسٹریل سٹیٹ ڈویلپمنٹ اینڈ مینجمنٹ کمپنی نا دورہ

اسلام آباد۔ 27 جنوری (اے پی پی) بنجائی وزیر بورڈ آف انویسٹمنٹ قیصر احمد شیخ سے شنبے نادے آ فیصل آباد انڈسٹریل سٹیٹ ڈویلپمنٹ اینڈ مینجمنٹ کمپنی (فیڈمک) نا دورہ ءِ کرے ، ہراڑے اودے خصوصی اقتصادی زونز و برجا صنعتی ڈٹ آتا پیش رفت آ سرجمی اٹ حوال تننگا۔ داوخت آ بنجائی وزیر پارے کہ فیڈمک ملکی صنعتی شونداری نا اسہ اہم ءُ مرکز اسے و حکومت خصوصی اقتصادی زون تے پین گچین، فعال و زرکاری کن سازگار جوڑ کننگ کن سنبرینگوک ءِ۔ اوداہیت آ زور شاغا کہ صنعت نا مون آ دننگ ہی ملکی زرگزران نا سوگوی نا ضمانت ءِ۔ بنجائی وزیر قیصر احمد شیخ پارے کہ حکومت صنعتکار آتے مون تروک ویل آتا ایسری کن پورو سنجیدگی اٹ گام گیج کننگ اٹی ءِ وخت اس کہ پاکستان اٹی زرکاری کن سازگار چاگڑد ساڑی ءِ۔ اواومیت ظاہر کرے کہ برجاسال ملکی و درملکی زرکاری ٹی نمان پیش رفت مون آ بسنے۔ حوال اٹی پاننگاکہ فیڈمک اٹی داوخت آ 90 فیکٹری فعال ءُ، 26 پوسکن ءُ فیکٹری جوڑ مسنے وخت اس کہ 31 صنعتی یونٹ جوڑ مننگ ءُ ہرا صنعتی سرجزآتیٹی ودکی نا پیدوار شاہدی ءُ۔ اوکان پد بنجائی وزیر فیصل آباد چیمبر آف کامرس اینڈ انڈسٹری نا عہدیدار آتون ہم اوڑدہی کرے ہراٹی صنعتی بشخ ءِ مون تروک چیلنج، زرکاری نا وارخواہی و کاروباری چاگڑد اٹی پین گچینی آ گپ وتران کننگا۔ بنجائی وزیر داعزم انا درشانی ءِ کرے کہ حکومت فیڈمک تون اوار غٹ صنعتی زون و خصوصی اقتصادی زون تے پین گچین جوڑ کننگ کن عملی گام گیج آتے برجاتخک وخت اس کہ بورڈ آف انویسٹمنٹ زرکارآتے ہرممکن آسراتی فراوان کننگ کن پبی کڑد ادا کرساکیک۔