الیکشن کمیشن گوشوارہ جمع کرفنگ آ پنجاب و خیبرپختونخوا اسمبلی نا چندی باسک آتا رکنیت ءِ بحال کرے

اسلام آباد۔ 27 جنوری (اے پی پی) الیکشن کمیشن آف پاکستان میرات و واجبات آتا گوشوارہ غاتے جمع کرفنگ آ پنجاب وخیبرپختونخوا اسمبلی نا ہمو باسک آتا رکنیت ءِ بحال کرینے ہراتدوک آدے تیٹی معطل کننگاسر۔ الیکشن کمیشن آن جاری نوٹیفکیشن نا رداٹ، 5 باسک آک کانودی خواست آتے پورو کرسا مالی سال 2024-2025ناگوشوارہ غاتے جمع کرفینو۔ الیکشن ایکٹ 2017 نا سیکشن 137 نا رداٹ ہر اسمبلی نا باسک و سینیٹر کن المی ءِ کہ او ہرسال 31 دسمبر اسکان تینا ، تینا شریک حیات و زیرکفالت چناتا میرات آتا سرجم آتے جمع کرفر ہراباسک آک دا سرجم آتے فراوان کتویسر، اوفتے 16 جنوری 2026آ اسہ نوٹیفکیشن اسےنا کمک اٹ کاریم کننگ آن توننگاسس۔ داسہ دا باسک آتا کنڈآن گوشوارہ جمع کرفنگ آن پد الیکشن کمیشن اوفتا رکنیت ءِ دمدستی وڑاٹ بحال کننگ نا پرمان کرینے۔ نوٹیفکیشن نا رداٹ پنجاب اسمبلی نا عامر حیات ہراج، حلقہ پی پی۔ 207خانیوال III۔، محمد سبطین رضا، حلقہ پی پی۔274 مظفر گڑھVII-، طارق مسیحی ءِ بحال کننگا۔ خیبرپختونخوا اسمبلی آن سمیع اللہ خان، حلقہ پی کے ۔ 76 پشاور V-، محمد سجاد ، حلقہ پی کے98-کرک II-نا رکنیت ءِ بحال کرینے۔ دافیصلہ نا کاپی اسپیکر ز و سیکرٹریز پنجاب و خیبرپختونخواہ اسمبلی ، سیکرٹری ٹو صدرمملکت، وزراء اعلیٰ نا سیکرٹریز و الیکشن کمیشن نا غٹ تعلقدار بشخ آتے مون تننگانے۔