پاکستان و گھانا نا نیام اٹ اولیکو ہڑتوم آ کنڈآتا سیاسی سلابت اس اڈہلک، اِرا مفاہمتی یات داشت آتیا دستخط

اسلام آباد۔ 27 جنوری (اے پی پی) پاکستان وگھانا اولیکو ہڑتوم آکنڈآتا سیاسی سلابت نا گھانا ٹی اڈ ہلک ہرا ہڑتوم آملک آتا نیام اٹ ہڑتوم آ کنڈآتا تعلقداری تا مون آ دننگ اٹ اسہ اہم ءُ مزل نا نشان اسے۔ سے شنبے نادے آ دفترخارجہ نا کنڈآن جاری بیان نا رداٹ پاکستانی ڈل انا کماشی ءِ ایڈیشنل سیکرٹری خارجہ حامد اصغر خان کرے وخت اس کہ گھانا نا کنڈآن وزارت خارجہ نا چیف ڈائریکٹر خدیجہ ادریسو ڈل انا کماشی ءِ کرے۔ سلابت اٹی اِرا مفاہمتی یات داشت آتیا دستخط کننگا۔ اسہ مفاہمتی یات داشت ہڑتوم آکنڈآتا سیاسی سلابت نا بابت ئس وخت اس کہ ایلو اسلام آباد نا فارن سروس اکیڈمی و گھانا فارن سروس انسٹی ٹیوٹ نا نیام اٹ طے مس۔ گپ وتران اٹی فریق آک تین پہ تینی تعلقداری تے پین سوگو کننگ نا عزم انا درشانی ءِ کریر و سیاسی، اقتصادی ، دفاعی ، سیل و سواتی ، دودوربیدہ ئی، جان جوڑی ، تعلیم، انفارمیشن ٹیکنالوجی و تین پہ تینی مفاد نا ایلو بشخ آتیٹی کمکاری ءِ ودفنگ آ امنا کریر۔ ہڑتوم آملک آک داہیت آہم امنا کریر کہ ہڑتوم آ کنڈآتا سیاسی سلابت نا بروک  آدور بروک آ سال اسلام آباد اٹی اڈتننگک۔ پاکستان و گھانا نا نیام اٹ کیہی دہائی تیا تالان دوستانہ و کمکاری آ تالان تعلقداری جوڑ ءِ۔ ادارہ جاتی گپ وتران نا دا عمل پین بامسخت و ڈٹ جاتی کمکاری نا کمک اٹ ہڑتوم آ کنڈآتا تعلقداری تے پین سوگو کننگ اٹ کمکار جوڑ مریک۔