ایس اینڈ پی گلوبل مارکیٹ انٹیلی جنس نا پیش گوئی بھلو حداسسکان ایس بی پی نا نقطہ نظرتون ہم گرنچ ءِ، سلاہکار وزیرخزانہ خرم شہزاد

اسلام آباد۔ 27 جنوری (اے پی پی) بنجائی وزیر خزانہ نا سلاہکار خرم شہزاد پارینے کہ ایس اینڈ پی گلوبل مارکیٹ انٹیلی جنس نا پیش گوئی بھلو حداسسکان سٹیٹ بینک پاکستان نا نقطہ نظر تون ہم گرنچ ءِ۔ سے شنبے نادے آ راجی رابطہ نا ویب سائٹ‘‘ایکس’’ آ تینا بیان اسے ٹی اوپارے کہ دُن تو ایس اینڈ پی نا رپورٹ اٹی زرگزرانی نمو وکرنٹ اکاؤنٹ نا بات زرس معمولی اختلافات ساڑی ءِ ولے ہڑتوم آ ادارہ غاتا کبینی ٹی کمتی و زرگزران اٹی پدریسہ گچینی نا بارواٹی اسہ وڑ سلاہ ءِ۔ اوپارے کہ ایس اینڈ پی نا پاکستان کن تینا تازہ انگا پیش گوئی ٹی کبینی ، کرنٹ اکاؤنٹ و زرگزرانی نمو نا بابت تازہ کساس آک اوار ءُ، دا پیش گوئی تا موازانہ  ءِ اسٹیٹ بینک پاکستان نا تازہ انگااومیت آتون کننگ مریک۔ اونا پاننگ ئس کہ ایس اینڈ پی 2026 اٹی کبینی نا کچ 5.1 درسد و 2027اٹی 5.6 درسد مننگ نا پیش گوئی کرینے وخت اس کہ اسٹیٹ بینک بروک آ اِرا سال آتیکن کبینی نا کچ 5 آن ہلیس 7 درسد نا نیام اٹ مننگ نا پیش گوئی کرے، ہندا وڑ ایس اینڈ پی 2026 اٹی حسابات جاریہ نا کھاتہ غاتا نسخان جی ڈی پی نا 0.5 درسد و 2027اٹی 1.3 درسد اسکان مننگ نا پیش گوئی کرینے۔ اسٹیٹ بینک نا کساس آتا رداٹ مالی سال 2026 اٹی حسابات جاریہ نا کھاتہ غاتا نسخان جی ڈی پی نا صفر آن ہلیس اسہ درسد اسکان مننگ نا پیش گوئی کننگانے وخت اس کہ ایس اینڈ پی 0.5 درسد اسکان مننگ نا پیش گوئی کرینے۔ مالی سال 2027 کن ایس اینڈ پی دا نسخان ءِ 1.3 درسد اسکان مننگ نا پیش گوئی کرینے ہرا اسٹیٹ بینک انا کساس آتا حداتون قدرے زیاتءِ۔ خرم شہزاد پارے کہ ایس اینڈ پی مالی سال 2026 کن جی ڈی پی ٹی ودکی نا کچ 3.5 درسد و مالی سال 2027اٹی 4.4 درسد اسکان مننگ نا پیش گوئی کرینے وخت اس کہ اسٹیٹ بینک مالی سال 2026 اٹی جی ڈی پی ٹی نمو نا کچ 3.75 آن ہلیس 4.75 درسد اسکان مننگ نا پیش گوئی کرینے۔ خرم شہزاد پارے کہ جم وڑاٹ ایس اینڈ پی نا پیش گوئی بھلو حداسکان اسٹیٹ بینک انا نقطہ نظر تون ہم گرنچ ءِ۔ اوپارے کہ دُن تو زرگزرانی نمو و کرنٹ اکاؤنٹ نا بابت زرس معمولی اختلافات ساڑی ءِ، ولے ہڑتوم آ ادارہ غاک کبینی ٹی کمتی و زرگزران اٹی پدریسہ گچینی نا بارواٹی اسہ وڑنا سلاہ تخرہ۔