نصیر آباد رینج انا غٹ ضلع غاتیٹی زالبول پولیس کارندہ غاتے چندی اہم و زموارانہ عہدہ غاتیا تعینات کننگانے، وزیراعلیٰ بلوچستان

کوئٹہ۔ 27 جنوری (اے پی پی) وزیراعلیٰ بلوچستان میر سرفراز بگٹی پارینے کہ صوبہ ٹی زالبول آتے واکدار کننگ و پولیس نظام ءِ الس دوست جوڑ کننگ نا کنڈآ اسہ پین عملی و گچین ءُ گام اس ہرفنگانے، ہرانا رداٹ نصیر آباد رینج انا غٹ ضلع غاتیٹی زالبو ل پولیس کارندہ غاتے اہم و زموارانہ عہدہ غاتیا تعینات کننگانے۔ وزیراعلیٰ ہاؤس آن جاری بیان اٹی میر سرفراز بگٹی پارے کہ زالبول پولیس کارندہ غاک داسہ چندی تھانہ غاتیٹی کمپلینٹ آفیسر، نائب محرر، کمپیوٹر آپریٹر تون اوار ایلو انتظامی و فیصلہ ساز زمواری سرتننگ ءُ۔ دا تعیناتی تیٹی زالبول کارندہ غاک اُرائی بیدادی تون اوار زالبول و لس شاری تے مون تروک ویل آتا بِننگ و دمدستی ایسری کن فعال و متحرک کڑد ادا کننگ نا بناءِ کرینو ہراڑآن السی پت اٹی نمان ودکی مننگ ءِ، وزیراعلیٰ بلوچستان دا گام آ آئی جی پولیس بلوچستان و ڈی آئی جی نصیر آباد رینج ءِ خراج تحسین پیش کرسا پارے کہ زالبول کارندہ غاتاپورو لائخی آن فائدہ ہرفنگ گچین پولیسنگ ، گچین سروس ڈیلیوری و السی آسراتی تیٹی گچینی نا سوب جوڑ مریک۔ اوپارے کہ دا اصلاحات نا کمک اٹ پولیس اسٹیشن تیٹی زالبول آتون اوار غٹ سُوالی تیکن اسہ رکھوک، باوقار و پت آ تالان چاگڑد اسے نا فراوانیءِ ممکن کننگ انگ ءِ ، تانکہ الس بے خو ف و خلیس تینا غاو تے نوشتہ کرفنگ کے ، وزیراعلیٰ پارے کہ داگام گیج آتیان نئے بیرہ پولیس نظام پین سوگو مریک بلکن زالبول آتا کانود نافذ کروک آ ادارہ غاتیا پت ہم ودک، ہرا اسہ مہذب و انصاف اٹ راج اسے نا ٹہیفنگ کن المی ءِ۔ میر سرفراز بگٹی داعزم انا درشانی ءِ کرے کہ بلوچستان اٹی زالبول آتے ہر بشخ اٹی بریبر وارخواہی فراوان کننگ صوبائی حکومت نا جوان وژن و اصلاحاتی ایجنڈا نا اہم بشخ ءِ و حکومت داسمت اٹی عملی گام گیج آتا چرجوئی ءِ آخبت اٹ ہم برجاتخک۔