ناجوڑی تیان بچنگ کن آگاہی بھاز المی ءِ، بنداوی جان جوڑی ہند آتے فعال کننگ اُن، بنجائی وزیر سید مصطفیٰ کمال

اسلام آباد۔ 27 جنوری (اے پی پی) بنجائی وزیر قومی جان جوڑی سید مصطفیٰ کمال پارینےکہ ناجوڑی تیان بچنگ و مون ءِ توننگ کن آگاہی بھاز المی ءِ، چنکا ناجوڑی تا درمان کن بنداوی جان جوڑی ہند آتے فعال کننگ اُن۔ داخیال آتا درشانی ءِ او ڈیجیٹلائزڈ ہیلتھ سینٹر نا دود آن تران کرساکرے۔ اوپارے کہ وزیراعظم محمد شہباز شریف و ننا کوشست ءِ کہ الس ءِ ناجوڑی تیان بچفن۔ ٹیلی میڈیسن نا کمک اٹ ناجوڑ آتے آسراتی فراوان کننگ اُن۔ ٹیلی میڈیسن نا کمک اٹ ڈاکٹر اُراٹی تولوک ناجوڑ آتے درمان ءِ کننگ کیرہ۔ اوپارے کہ ناجوڑی تیان بچنگ و مون ءِ توننگ کن آگاہی بھاز المی ءِ ، گڑاس کاریم الس نا کروک ءُ ہم مریرہ حکومت درگہ اسکان بننگ کیک ولے درگہ ءِ ملسا چناتے ویکسین نمے ہم کرفوئی ءِ۔ اوپارے کہ احتیاط درمان آن جوان ءِ، ہیلتھ کیئر نا مسخت ناجوڑی تا درمان اف بلکن الس ءِ ناجوڑی تیان بچفنگ ءِ، بنداوی جان جوڑی ہند آتیٹی 13 ناجوڑی تیان بچفنگ نا ویکسین فراوان کننگ انگ ءِ ، کورونا نا ویکسین بس و کورونا نا مون ءِ توننگا ، کینسر آن بچفنگ نا ویکسین ہم 15 سال اٹی بریک۔ اوپارے کہ ننے ناجوڑی تا توننگ کن گچین آن گچین بست بند کروئی ءِ۔ دایوسی ءِ ماڈل یوسی اس جوڑ کروئی ءِ ہراڑے اسہ چناس ہم ویکسین آن بیدس سلپ۔ بنداوی جان جوڑی ہند آتا وخت ءِ ودفسا شام انا 6 بجہ اسکان کننگانے، نن غٹ مخلوق ءِ جان جوڑی نا گچین آسراتی تننگ اُن۔ پاکستان اٹ زالبول آک میڈیکل اٹی زیات بریرہ، ولے او جاب کپسہ۔ داوخت آ ملک انا 70 درسد زالبول ڈاکٹرنوکری کپننگ ءُ، پوسکن ءُ ڈاکٹر بھرتی کننگک و دا زالبول آک ٹیلی میڈیسن نا کمک اٹ خذمت فراوان کیرہ۔