تعلیمی نظام نا سوگوی ، شفافیت و آب اٹی گچینی حکومت نا اولیت مسنے، وجیہہ قمر

اسلام آباد۔ 27 جنوری (اے پی پی) وزیر مملکت بنجائی تعلیم و کسبی تربیت وجیہہ قمر پارینے کہ تعلیمی نظام نا سوگوی، شفافیت و آب اٹ گچینی حکومت نا اولیت مسنے، وزیراعظم محمد شہباز شریف نا پیدوار پارت آتا رداٹ سسٹم ءِ سوگو کننگ آن بیدس پائیدار شونداری ممکن اف۔ سے شنبے نادے آ پی آئی ڈی ٹی پریس کانفرنس آن تران کرسا وجیہہ قمر پارے کہ حکومت ادارہ جاتی اصلاحات تون اوار اوار ورناتا تعلیم و تربیت آ پبی چکار کرینے۔ اوپارے کہ تعلیم نا بشخ اٹی مثبت نتیجہ غاتیکن وخت درکار مریک انتئے کہ چین تا جوڑ کننگ اسہ پدریسہ ءُ عمل اسے ولے حکومت بناآن ہی ڈیجیٹل اصلاحات نا کمک اٹ شفافیت و جواب دہی ءِ پک کرینے۔ اوپارے کہ وزارت تعلیم تینا گیشتر امور ءِ ڈیجیٹل پلیٹ فارم آ گدریفینے، ہراڑآن پروسیسنگ ، ٹریکنگ و احتساب نا نظام سوگو مسنے۔ ٹینڈرز نا جاچ پڑتال ہم ڈیجیٹل وڑاٹ کننگ انگ ءِ ہرا شفافیت ءِ مون آ دننگ اٹ اہم کڑد ادا کننگ ءِ۔ وزیر مملکت نا رداٹ وزیراعظم نا پارت آ وزارت آتیٹی ای پیڈز درستی راستی کرفنگا تانکہ فیصلہ سازی ٹی ڈیجیٹلائزیشن ءِ مون آ دننگ مرے و السی پت بحال مرے۔ وجیہہ قمر پارے کہ فیڈرل ڈائریکٹوریٹ آف ایجوکیشن (ایف ڈی ای) ، فیڈرل بورڈ و ہائر ایجوکیشن کمیشن (ایچ ای سی) تین پہ تینی شریداری اٹ تعلیمی آب ءِ گچین  جوڑ کننگ کن چندی گام گیج کرینو۔ ایف ڈی ای ٹی ڈیجیٹل پورٹل آتا کمک اٹ مانیٹرنگ کننگ انگ ءِ وخت اس کہ اے آئی آ تالان پورٹل پوروی نا ریسہ غاتیٹی ءِ تانکہ فیصلہ غاتے ڈیٹا وراستی تا بنداو آ کننگ مرے و اوفتا نتیجہ غاک ہم پیدوار وڑاٹ مون آ بریر۔ اوپارے کہ طالب علم و لمہ و باوہ غاتا غاوتا نوشتہ و ازالہ کن پورو میکنزم اس ساڑی ءِ ، ورنا تا تعلیم ءِ پین گچین جوڑ کننگ کن ایچ ای سی، ایف ڈی ای و ایلو ادارہ غاک اواری اٹ کاریم کننگ ءُ۔ وزیر مملکت پارے کہ تعلیمی نظام اٹی مصنوعی ذہانت(اے آئی) نا کمک ءِ ہلنگ نا فیصلہ کننگانے و غٹ تعلیمی ڈیٹا ءِ رکھوک دروشم اسے ٹی تخنگ آ کاریم برجاءِ۔ دا بابت ایچ ای سی نا رداٹ ‘‘مکتب’’ نا پن اٹ اسہ جوان ءُ ڈیجیٹل سسٹم اس درستی راستی کرفنگانے ہرانا بناءِ ایچ ای سی ٹی کننگا۔ اولیکو ریسہ ٹی 25پبلک یونیورسٹی تیٹی اونا بناءِ کننگ انگءِ وخت اس کہ آخبت اٹ اودے غٹ پبلک یونیورسٹی تسکان ودفنگک۔ اوپارے کہ مکتب سسٹم نارداٹ ہر طالب علم نا بناآن ہلیس ڈگری اسکان پورو تعلیمی ریکارڈ، گریڈز، ٹرانسکرپٹ و ڈگری نا جاری کننگ نا شفاف نظام اسہ ہی پلیٹ فارم آ دوئی مریک، داڑآن وخت انا بچت تون اوار اوار شفافیت ودک و دانظام اسہ‘‘گیم چینجر ‘‘ اس جوڑ مریک، ہراڑآن پاکستان نا جہانی ساکھ ہم سوگو مریک۔ وجیہہ قمر مستی پارے کہ ایف ڈی ای ٹی بی ایس پروگرام کن اسہ مرکزی ای پورٹل اس درستی راستی کرفنگانے ہراڑآن چار ہزار نا خڑک طالب علم آک فائدہ ہرفرہ۔ اولیکو ریسہ ٹی بی ایس پروگرام وخت اس کہ اوکان پد ایلو داخلہ عمل ہم داسسٹم اٹی اوار کننگک۔ ہندا وڑ انٹربورڈ کوآرڈی نیشن کمیٹی (آئی بی سی سی) ٹی ہم آن لائن سسٹم درستی راستی کرفنگانے ہراڑے اسہ آئی ڈی نا کمک اٹ ایکویلینس و ویری فیکیشن ءِ 24 گھنٹہ ٹریک کننگ مریک، ہراڑآن جہانی بورڈ انا رجسٹریشن نا عمل ہم ترند مسنے۔