وزیراعظم محمد شہباز شریف نا پاکستان اٹی جیم سٹونز نا کوڑی تا کچ ءِ کاریم اٹ اتنگ و نہادی خل تا برآمدات آن نہادی زرمبادلہ کٹیا کننگ نا گرج آ زور

اسلام آباد۔ 26 جنوری (اے پی پی) وزیراعظم محمد شہباز شریف پاکستان اٹی جیم سٹونز نا کوڑی تا کچ ءِ کاریم اٹ اتنگ و نہادی خل آتا برآمدات آن نہادی زرمبادلہ کٹیا کننگ نا گرج آ زور شاغسا پارینے کہ جیم سٹون انڈسٹری ٹی ویلیو ایڈیشن آن برآمدات آتیٹی ودکی ءِ پک کننگ مریک۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی نہادی خل و معدنیات نا مون آ دننگ نا بابت دیوان اس اڈہلک  ہراٹی وزیراعظم نا خصوصی کمکار ہارون اختر و تعلقدار بڑزکو سرکاری آفیسر آک بشخ ہلکر۔ دیوان آن تران کرسا وزیراعظم پارے کہ پاکستان اٹی جیم سٹونز نا کوڑی تا کچ ءِ کاریم اٹ اتنگ نا گرج ءِ تانکہ دا نہادی خل تا برآمدات آن نہادی زرمبادلہ کٹیا کننگ مرے۔ اواسلام آباد، گلگت بلتستان و آزاد جموں وکشمیر نا سلاہ ئی جیم سٹون سینٹرآتا تفنگ کن جہانی شہرت تخوک تعلقدار چاہندار آتا خذمت آتے دوئی کننگ و اسلام آباد جیم سٹون سینٹر ءِ اگست 2027 ء اسکان پورو کننگ نا پارت کرے۔ وزیراعظم جہانی چاہندار آتا کمک اٹ پالیسی فریم ورک آ عملدرآمد ءِ پک کننگ نا پارت کرساپارے کہ جیم سٹون انڈسٹری ٹی ویلیو ایڈیشن آن برآمدات آتیٹی ودکی ءِ پک کننگے۔ اوسلاہ ئی جیم سٹون سینٹر آتیٹی پوسکن آ ٹیکنالوجی و ازباب خلنگ و جیم سٹون انڈسٹری نا مون آ دننگ نا بابت غٹ صوبہ، گلگت بلتستان و آزاد جموں وکشمیر نا حکومت آتون اواری اٹ کاریم کننگ نا پارت کرے۔ دیوان اٹی وزیراعظم ءِ جیم سٹون انڈسٹری ناشون تننگ نا بابت گام گیج آتیا حوال تننگا ہراٹی پاننگاکہ پوسکن منظور مروک جیم سٹون پالیسی آ اسٹیک ہولڈر آتے پک اٹ ہلنگ نا بابت چار سیشن اڈتننگا، اسلام آباد اٹی جیم سٹون سینٹر نا جوڑ کننگ نا بابت شاہراہ دستور آ جاگہ نا تعین ءِ کننگانے، اسلام آباد جیم سٹون سینٹر اٹی جہانی آب انا ویلیو ایڈیشن سروسز، سرٹیفکیشن ، انکیوبیشن سینٹر و ٹریڈ سینٹر نا آسراتی فراوان کننگک، سٹیٹ بینک آف پاکستان و فیڈرل بورڈ آف ریونیو نا دفترآک ہم ساڑی مریرہ۔ وزیراعظم ءِ پاننگاکہ جیم سٹون نا بابت جیو فینسنگ سائنٹفک روڈ میپ اسے آ کاریم نا بناءِ کننگانے۔