بنجائی وزیر ڈاکٹر مصدق ملک تون ڈنمارک انا سفیر ماجامور ٹینسن نا اوڑدہی

اسلام آباد۔ 26 جنوری (اے پی پی) بنجائی وزیر موسمیاتی بدلی و چاگڑدی ہم گرنچی  ڈاکٹر مصدق ملک تون پاکستان اٹی ڈنمارک نا سفیر ماجامور ٹینسن داڑے اوڑدہی کرے۔ اوڑدہی ٹی ساڑی آ جہان سیاسی رداٹ سائنسی سفارتکاری نا چندی پلوآتا سرجمی اٹ جاچ ءِ ہلنگا۔ دوشنبے نادے آ وزارت موسمیاتی بدلی و چاگڑدی ہم گرنچی نا کنڈآن جاری بیان نا رداٹ بنجائی وزیر ڈاکٹر مصدق ملک گپ وتران اٹی داہیت آ زور شاغا کہ موسمیاتی بدلی نا غیرمتناسب بھاریم جہانی سویل نا ملک آتیا تمنگ ءِ۔ حالانکہ جہانی اخراج اٹی اونابشخ نسبتاََ کم ءِ۔ اوپیدواری کرے کہ جہانی گرین ہاؤس گیس آتا کم وو د 70 درسد اخراج نازمہ بیرہ دہ ملک آک ءُ وخت اس کہ جہانی کہول آ دوئی کم و ود 85 درسد گرین فنانسنگ ہم ہندا ملک آتے دوئی مننگ ءِ۔ ڈاکٹر مصدق ملک نارتھک ملک آتا سوگو راجی آسودہی ماڈلز و شونداری پسند چاگڑدی قدر انا ستاءِ کرے۔ اوڑدہی ٹی ساڑی آ جہانی سیاسی حالیت و اوفتا موسمیاتی گام گیج و جہانی کمکاری آ اثرآتیا ہم گپ وتران کننگا۔ داوخت آ بنجائی وزیر ڈنمارک نا سفیر ءِ پاکستان اٹی اسہ گرین یونیورسٹی اسے نا جوڑ کننگ نا ڈٹ آن ہم معلومدار کرے ہرانا مسخت موسمیاتی و چاگڑدی علم انا بشخ اٹی اسیجائی پٹ وپول نیز دنیا نا پنی آ جامعہ غاتون طالب علم و استاد آتا  تبادلہ  پروگرام تے مون آ دننگ ءِ۔ اوڑدہی نا ایسر آ ہڑتوم آ فریق آک ہڑتوم آکنڈآتا کمکاری ءِ پین سوگو کننگ و موسمیاتی گام گیج و سائنسی سفارت کاری نا بشخ آتیٹی شریداری عمل ءِ مون آدننگ نا عزم انا درشانی ءِ کریر۔