نیزگاری نا چٹفنگ کن ریاست تون سخی، سول سوسائٹی و نجی بشخ ءِ کڑد ادا کروئی مریک، چیئرمین سینیٹ سید یوسف رضاگیلانی

ملتان۔ 26 جنوری (اے پی پی) چیئرمین سینیٹ سید یوسف رضاگیلانی پارینے کہ نیزگاری نا چٹفنگ بیرہ ریاست نا وس انا ہیت اس اف، دامسخت کن سخی، سول سوسائٹی و نجی بشخ ءِ حکومت تون شریداری کروئی مریک۔ اودوشنبے نادے آ پنجاب اٹی پاکستان پاورٹی  ایلیوی ایشن فنڈ (PPAF)کنڈآن دود‘‘پی پی اے ایف نا کمیونٹی انفراسٹرکچر و زرگزرانی واکداری گام گیج’’ آن تران کریکہ۔ سید یوسف رضاگیلانی پارے کہ نیزگاری ٹی کمتی کن اجتماعی کوشست و پبلک پرائیویٹ پارٹنرشپ المی ءِ، سول سوسائٹی و آسودہی ادارہ غاک حکومت نا آسودہی ڈٹ آتیٹی پبی کڑد ادا کیر۔ چیئرمین سینیٹ پاکستان پاورٹی ایلیوی ایشن فنڈ و اونا 63شریدار ادارہ غاتا خذمت آتا ستاءِ کرسا پارے کہ پی پی اے ایف بے سود وام، جان جوڑی و تعلیم نا بشخ آتیٹی نمان زرکاری نا کمک اٹ اہم کڑد ادا کرینے۔ اوبنجائی وزیر تخفیف نیزگاری و راجی رکھ سید عمرا ن احمد شاہ نا کوشست آتے ہم خراج تحسین پیش کرے۔ سید یوسف رضاگیلانی تینا دورِ وزارتِ عظمیٰ ءِ یات کرساپارے کہ اونیزگار و حقدار خاہوت آتا کمکاری کن بینظیر انکم سپورٹ پروگرام نا بناءِ کرے ، ہرانا رداٹ زالبول آتے خاہوت نا سروک گوندسا زرگزرانی و راجی وڑاٹ واکدار جوڑ کننگا۔ اوپارے کہ خیبرپختونخوا ٹی سیکورٹی آپریشن تیٹی کم و ود 25لکھ بے اُرا بندغ آتے 90دے انا تہہ ٹی بحال کننگ اسہ تاریخی ءُ سرسہبی اس ئس۔ جہانی زرگزرانی تنکی ٹی تینا حکومت نا کشاری پالیسی تا ذکر ءِ کرسا اوپارے کہ کشت وکشار ءِ سوگو کرسا خولم، برنج، کرپاس و بورہ نا ریکارڈ پیدوار و برآمدات ممکن جوڑ کننگا۔ چیئرمین سینیٹ داہیت آ زور شاغا کہ بزغر، زالبول و چناتے زرگزرانی وڑاٹ واکدار کننگ آن بیدس پائیدار شونداری ممکن اف۔ اوسندھ ڈویلپمنٹ آرگنائزیشن ءِ ہم PPAFنا شریدار جوڑ کننگ نا سلاہ تس و پارے کہ یونیسیف نا کنڈآن سندھ حکومت ءِ جان جوڑی و تعلیم کن خاطرخواہ فنڈ فراوان کننگانے۔ داوخت آ پی پی اے ایف نا چیف ایگزیکٹیو آفیسر نادرگل پارے کہ ادارہ مچ آملک اٹی کم و ود 390تعلیمی و 90جان جوڑی نا ڈٹ آتیٹی زرکاری کرینے۔ او 2005نا زمی جمب آن پد 12 ہزار 200 ہند آتا تفنگ ، 49 ہزار آن زیات خاہوت آتے خور انا فراوانی و 2025نا نوکاپ آن پد کمکی سرجزآتا ذکر ءِ کرے۔ اوپارے کہ کم و ود 2ہزار بی آئی ایس پی فائدہ ئی خاہوت آتے ماہی گیری تون اوار چندی کسبکاری نا تربیت تننگا۔ ڈپٹی کوآرڈینیشن آفیسر، پنجاب سینٹر آف ایکسی لینس آن کاؤنٹرنگ وائلنٹ ایکسٹریمزم (COV-CVE)ڈاکٹر احمد خاور شہزاد نیزگاری نا چٹفنگ و امن کن حکومتی گام گیج آتے مون آتخا و پارے کہ ملک انا 45 درسد آن زیات آبادی نیزگاری نا لکیر آن شیف زند ءِ تیر کننگ ءُ، ہراڑکن اسیجائی کوشست آتا گرج ءِ۔ دود اٹی پیپلزپارٹی نا قومی اسمبلی نا باسک سمیع گیلانی، ڈپٹی سیکرٹری ایس ای ڈی سویلی پنجاب خیل مظہر صدیقی، سی ای او ایجوکیشن ڈاکٹر صفدر واگھا و چندی شریدار این جی اوتا نمائندہ غاک ہم بشخ ہلکر۔