صدر مملکت آصف علی زرداری اینو آن متحدہ عرب امارات نا 4 دے ئی دورہ ءِ کیک، دفترخارجہ

اسلام آباد۔ 26 جنوری (اے پی پی) صدر مملکت آصف علی زرداری اینو 26 آن 29 جنوری 2026 اسکان متحدہ عرب امارات نا سرکاری دورہ ءِ کیک، دورہ ٹی اوڑتون اوار اسہ بڑزکو کہول انا ڈل اس ہم مریک ۔ دوشنبے نادے آ وزارت خارجہ غان جاری بیان نا رداٹ یواے ای نا دورہ ٹی صدر مملکت آصف علی زرداری متحدہ عرب امارات نا سرکڑدہ غاتون بڑزکو کہول انا اوڑدہی کیک  ہرافتے ٹی ہڑتوم آ کنڈآتا تعلقداری خاص کر واپار و اقتصادی شریداری، دفاعی و سلامتی ، و السی رابطہ غاتا بشخ آتیٹی کمکاری آ گپ وتران مریک۔ داکان بیدس علاقائی و جہانی امور آہم گپ وتران کننگک ہرا ہڑتوم آملک آتا تین پہ تینی مفاد نا بابت ءِ۔ صدرِ پاکستان نا دا دورہ زوت آتے اٹ متحدہ عرب امارات نا صدر نا پاکستان نا دورہ غان پد مننگ ءِ و ہرا ہڑتوم آ ایلم ملک آتا نیام اٹ برادرانہ تعلقداری تا عکاسی ءِ کیک و داعزم ءِ پوسکن کیک کہ پاکستان و متحدہ عرب امارات نا سوگو سنگتی ءِ اسہ تین پہ تینی فائدہ غاتیا تالان و بھرمی شریداری ٹی بدل کننگے۔