چین نا کنڈآن پاکستان کن کمکی گڑاتا چارمیکو کھیپ بحری جہاز انا کمک اٹ کراچی آ سرمس

اسلام آباد۔ 26 جنوری (اے پی پی) چین نا کنڈآن پاکستان کن کمکی گڑاتا چارمیکو کھیپ بحری جہاز انا کمک اٹ کراچی آ سرمسنے۔ این ڈی ایم اے نا رداٹ ساڑی آ کمکی کھیپ اٹی اسہ ہزار سلیپنگ بیگ، 14 ہزار تمبو و 12 ہزار کمبل اوار ءُ، ہرافتے ٹرک آتا کمک اٹ این ڈی ایم اے نا کراچی ویئر ہاؤس آ گدریفنگانے۔ این ڈی ایم اے نا میڈیا ونگ انا رداٹ داکان مست 26 دسمبر 2025 آ چین آن ملوک آ مسٹ میکو کمکی کھیپ اٹی 100 کشتی، 5 ہزار تمبو و 8 ہزار کمبل اوار ئسر۔ 4 اکتوبر 2025 آ بروک آ ارٹ میکو کھیپ اٹی 16 ہزار کمبل، 700 تمبو، اسہ ہزار لائف جیکٹ و 4 ہزار سلیپنگ بیگ فراوان کننگاسس، وخت اس کہ 28 ستمبر 2025آ ملوک آ اولیکو کمکی کھیپ اٹی 9 ہزار کمبل و 300 تمبو اوار ئسر۔ این ڈی ایم اے نا رداٹ چین آن ملوک آ ہر چار آ کمکی کھیپ آتیٹی جم وڑاٹ 45 ہزار کمبل، 20 ہزار تمبو، 100 کشتی ، اسہ ہزار لائف جیکٹ و 5 ہزار سلیپنگ بیگ پاکستان ءِ فراوان کننگانے۔ این ڈی ایم اے پیدوار کرینے کہ او تینا غٹ وسیلہ غاتے آفت آتیان زہمی بندغ آتے کن کاریم اٹ اتنگ ءِ و زہمی علاقہ غاتیٹی گرج انا رداٹ کمکی گڑاتا فراوانی ءِ پک کننگک۔