وزیراعظم نا خصوصی کمکار واپار رانا احسان افضل خان نالاہور ایکسپو سینٹر اٹی میگا لیدر شوانا بطور مہمان خاص بناء

اسلام آباد۔ 26 جنوری (اے پی پی) وزیراعظم نا خصوصی کمکار واپار رانا احسان افضل خان لاہور ایکسپو سینٹر اٹی میگا لیدر شوانا بطور مہمان خاص بناءِ کرے۔ دوشنبےنادے آ بنائی دود اٹی او ربن ءِ کاٹ کرسا نمائش نا باقاعدہ بناءِ کرے، اوکان پد او چندی اسٹال آتا دورہ ءِ کرے و ملکی ودرملکی نمائش کنندگان آتون اوڑدہی کرے۔ میگا لیدر شو پاکستان نا صنعتی زرگزران، خاص کر لیدر سیکٹر کن اسہ اہم و نمان پیٹ فارم اسے نا حیثیت تخک۔ دا نمائش کاروباری رابطہ، جدت و برآمد آتا مون آدننگ کن اسہ گچین ءُ ذریعہ اس تکنگک۔ برجاسال نمائش اٹی 200 آن زیات کمپنی بشخ ہلکر ہرافتے ٹی بھلو کچ اس جہانی ادارہ غاتا ہم اوار ءِ۔ چین آن بروک آکمپنی تا نمان بشخ ہلنگ داہیت انا ڈیک ءِ کہ میگالیدر شو جہانی واپار و زرکاری کن اسہ اہم ءُ مرکز اس جوڑ مرسا کننگ ءِ۔ بناغان پد میڈیا تون گپ وتران کرا رانا احسان افضل خان پارے کہ لیدر سیکٹر پاکستان نا برآمدات آتیٹی اہم کڑد ادا کیک و حکومت دا بشخ انا کچ ءِ ودفنگ کن پالیسی کہول آ پبی گام گیج کننگ ءِ۔ اوپارے کہ داوڑنا جہانی نمائش آک نئے بیرہ پاکستانی گڑاتے جہانی منڈی اسکان رسینگ فراوان کیرہ بلکن درملکی زرکاری نا وارخواہی ہم ودی کیرہ۔ خصوصی کمکار پارے کہ حکومت پاکستان نا اولیت جارحانہ واپاری مون آدننگ، برآمدات آتیٹی ودکی، و صنعت آتے آسراتی فراوان کننگ ءِ۔ میگالیدر شو کون آ ایونٹ آتیٹی بڑزکو کہولی بشخ ہلنگ دا عزم انا ڈیک ءِ کہ حکومت کاروباری برادری اتون ااواری ٹ پائیدار زرگزرانی شونداری و برآمد آتا مون آ دننگ کن عملی گام گیج  آتے برجاتخک۔