بنجائی وزیر داخلہ محسن نقوی ڈائریکٹوریٹ جنرل امیگریشن اینڈ پاسپورٹس اٹی پوسکن انگا مانیٹرنگ نظام ’’شکرا‘‘ نا باقاعدہ بناءِ کرے

اسلام آباد۔ 26 جنوری (ا ے  پی پی) بنجائی وزیر داخلہ محسن نقوی ملک انا پاسپورٹ سسٹم ءِ پوسکن آوڑتتون ہم گرنچ کرسا ڈائریکٹوریٹ جنرل امیگریشن اینڈ پاسپورٹس اٹی پوسکن انگا مانیٹرنگ نظام ’’شکرا‘‘ نا باقاعدہ بناءِ کرینے۔ داانقلابی گام آن پد پاکستان نا پاسپورٹ سسٹم دنیا نا شون ہلوک ملک آتا ہم پلہ مسنے ہراڑآن نئے بیرہ ملک اٹی بلکن پیشن نا ملک رہینگوک آ پاکستانی تیکن پاسپورٹ نا درخواست و ڈیلیوری نا ریئل ٹائم چاروکی ممکن مننگ کیک۔ وزیرداخلہ ءِ حوال اٹی پاننگاکہ ’شکرا‘ سسٹم (سیکوئر ہائبر یڈ انٹیلی جنس فارنالج بیسڈریسپونس انالیٹکس) اسہ ہندن ءُ ڈیجیٹل ڈیش بورڈ اسے ہرا پاسپورٹ جوڑ مننگ ناہر ریسہ نا تینٹ چاروکی ءِ کیک۔ دا نظام دفترآتیٹی بھلارش، پرنٹنگ اٹی تاخیر و مشینری نا حالیت آتا دمدستی پیدواری ءِ کیک وخت اس کہ انسانی نیام تمنگ ءِ چٹفنگ کن پوسکن آجرمن مشین تے خلنگانے ہرافتیان پرنٹنگ نا کاریم نا کچ اٹی کیہی ہنداخہ پین ودکی مسنے۔ محسن نقوی داوخت آ اہم اصلاحات ناپڑو کرسا ایمرجنسی ٹریول ڈاکومنٹ نا نظام ءِ ہم پورو ڈیجیٹل کرینے، وخت اس کہ شاری تا غاوتا چٹفنگ کن 7/24کال سینٹر و مانیٹرنگ روم اس ہم فعال کننگانے۔ وزیر داخلہ مانیٹرنگ روم ، فرانزک لیب و پروڈکشن یونٹ نا معائنہ ءِ کرسا ڈی جی پاسپورٹس و اونا ٹیم نا ستاءِ کرے و پیدوار کرے کہ پاکستانی پاسپورٹ نا سیکورٹی فیچرز داسہ جہانی ہوابازی نا ادارہ (ICAO)نا مقررہ آب انا عین رداٹ ءِ۔ وزیرداخلہ گپ وتران کرساپارے کہ ننا اصل مسخت شاری تے جہانی آب انا  ترند رفتار ورکھوک خذمت فراوان کننگ ءِ۔ پوسکن آنظام نا سوب آن داسہ شاریک تینا پاسپورٹ نا ہرریسہ نا معلومداری ءِ دوئی کننگ کیرہ، ہراڑآن محکمہ ٹی شفافیت بریک و کرپشن یا ایجنٹ مافیا نا کسر پورو وڑاٹ بند مریک۔ دود اٹی ڈی جی ایف آئی اے، چیف کمشنر و آئی جی اسلام آباد تون اوار ایلو بڑزکو کمامدارآک ہم ساڑی ئسر۔