پاکستان نا تیل و گیس انا بشخ اٹی آذربائیجان نا ودوک آ است خواہی بھاز اہم واست بڈءُ پیش رفت اسے، سینیٹر محمد عبدالقادر

کوئٹہ۔ 25 جنوری (اے پی پی) چیئرمین قائمہ کمیٹی دفاعی پیداوار سینیٹر محمد عبدالقادر پارینے کہ پاکستان نا تیل و گیس انا بشخ اٹی آذربائیجان نا ودوک آ است خواہی توانائی نا بشخ اٹی بھاز اہم پیش رفت اسے ، ہڑتوم آملک آتا نیام اٹ ساڑی آ رابطہ و توانائی کمکاری نا فیصلہ داہیت انا پیدواری ءِ کیک کہ آذربائیجان ، ہراتینٹ تیل وگیس انا پیدوار اٹی جہانی کہول آنمان ہند اس تخک، پاکستان اٹ زرکاری نا گیشتر گمان تے خننگ ءِ و دارداٹ بلوچستان اسہ ہندن ءُ صوبہ اسے ہراڑآ خاص چکار کننگ المی مسنے ، بلوچستان معدنی وسیلہ ، خاص کر تیل و گیس انا کوڑی تیان شپ ءِ ولے بھلو وخت اسے آن دا وسیلہ غاتے پورو وڑاٹ دریافت و کاریم اٹ اتنگ متو، صوبہ نا چندی علاقہ غاتیٹی تیل و گیس انا بھلو کوڑی ساڑی ءِ، ہرافتا پوسکن آ ٹیکنالوجی و زرکاری نا کمک اٹ پٹنگ ممکن ءِ۔ داڑے جاری مروک اسہ بیان اسے ٹی چیئرمین قائمہ کمیٹی دفاعی پیداوار سینیٹرمحمد عبدالقادر پارے کہ آذربائیجان تون نئے بیرہ تیل و گیس انا دریافت و دُون تا خُتنگ نا بشخ اٹی گیشتر آزموندہ ءِ بلکن پوسکن تکنیکی مہارت ہم ساڑی ءِ، ہرا بلوچستان کن فائدہ مند جوڑ مننگ کیک اگہ آذربائیجان بلوچستان اٹی تیل و گیس انا پٹنگ و پیدوار نا ڈٹ آتیا چکار تخک تو داڑآن ہندی زرگزران ءِ نمان فائدہ رسینگک ، مچ آ بلوچستان اٹی روزگار نا پوسکن وارخواہی ودی مریک، بنداوی پنجر نا شونداری مریک و صوبہ ٹی زرگزرانی سرجزآک ودرہ داڑتون اوار اوار پاکستان ءِ توانائی نا تنکی نا مون ءِ توننگ اٹی ہم کمک رسینگک دا کمکاری نا سرسہبی کن شفاف پالیسی ، ہندی آبادی نا شمولیت و سیکورٹی نا گچین حالیت آتے پک کروئی مریک ، تانکہ آذربائیجان نا زرکاری نئے بیرہ توانائی نا بشخ ءِ سوگو کے بلکن بلوچستان نا الس نا شونداری نا ذریعہ ہم جوڑ مرے۔