حکومت وادی تیراہ غان مخلوق نا کشنگ نا بابت دروغ انا پروپیگنڈا نا سختی اٹ نوٹس ءِ ہلکنے، خیبرپختونخوا حکومت برانز نا سیاست نا جاگہ غا السی ویل آتا چکار کے، عطاء اللہ تارڑ

کوٹ مومن۔ 25 جنوری (اے پی پی) بنجائی وزیر حوالکاری وشینکاری عطاء اللہ تارڑ پارینے کہ حکومت وادی تیراہ غان مخلوق آتا کشنگ نا بابت دروغ و بے بنداو پروپیگنڈا نا سختی اٹ نوٹس ءِ ہلکنے، علاقہ ءِ خورک کرفنگ نا بابت سٹی و راستی تیان چپ خبر چلیفنگا، خیبرپختونخوا حکومت نا کنڈآن چار ارب روپئی نا فنڈ منشاکارانہ وڑاٹ ہمپوک آ بندغ آتیکن جتا کننگادا بابت خیبرپختونخوا حکومت نا ریلیف و بحالی ڈیپارٹمنٹ نا باقاعدہ نوٹیفکیشن ساڑی ءِ، وادی تیراہ غان ہمپنگ ءِ پاک فوج اتون گنڈنگ  سراسر بے بنداو و غلط ءِ۔ یک شنبے نادے آ داڑے سینئر صحافی عون شیرازی نا اُرائی نا کزیت آ ہڑزخواہی آن پد میڈیا تون گپ وتران کرسا بنجائی وزیر حوالکاری عون شیرازی نا اُرائی نا کزیت آ ڈکھیائی و است ہسونی نا درشانی ءِ کرسا پارے کہ او ہڑزخواہی کن تینٹ حاضر مسنے ، نن دا ڈکھیائی ٹی پدسلوک آ خاہوت تون بریبرنا شریک اُن۔ اودعاکرے کہ اللہ تعالیٰ ایماندار ءِ جنت الفردوس اٹی بڑزکو ہند اس عطاکے و خاہوت ءِ صبر وجمیل ایتے۔ عطاء اللہ تارڑ پارے کہ سید عون شیرازی و اونا خاہوت نا صحافت تون بھلو تعلق اسے و او ہرا زمواری و وقار اتون صحافت نا بشخ اٹی خذمت سرتسنے او ستاکڑزک۔ وادی تیراہ غان مخلوق نا ہمپنگ نا ذکر ءِ کرسا بنجائی وزیر حوالکاری پارے کہ حکومت وادی تیراہ غان مخلوق نا کشنگ نا بابت تالان کروک آ دروغ و بے بنداو پروپیگنڈا نا سختی اٹ نوٹس ءِ ہلکنے۔ وادی تیراہ ٹی ہمپنگ ءِ پاک فوج اتون گنڈنگ سراسر بے بنداو و غلط ءِ۔ بنجائی وزیر پارے کہ خیبرپختونخوا حکومت نا ریلیف و بحالی ڈیپارٹمنٹ نا باقاعدہ نوٹیفکیشن ساڑی ءِ ہراٹی صوبائی حکومت نا کنڈآن چار ارب روپئی نا فنڈ منشاء اٹ ہمپوک آ بندغ آتیکن جتا کننگانے ہرانا مسخت موسم نا شدت و ایلو عوامل آتا رداٹ مخلوق ءِ آسراتی فراوان کننگ ءِ۔ اوپارے کہ ڈپٹی کمشنر خیبر ہم دا بابت وضاحت جاری کرینے کہ جرگہ مس و ہرامخلوق موسم نا شدت نا رداٹ منشااٹ ہِننگ خوائسرہ دا زر ءِ اوفتے کن تخنگانے۔ اوپارے کہ انٹیلی جنس بیسڈ آپریشن نا اسہ پیدوار ومنظم وڑوڈول اس مریک ہراٹی الس ءِ ہچ ءُ دقت اسے تون مون تروئی تمپ۔ اوڑآن چپ دا پاننگ کہ فوج علاقہ ءِ خورک کرفنگ ءِ، غلط و بے بنداو ءِ۔ بنجائی وزیر پارے کہ وزارت حوالکاری دا بابت باقاعدہ پریس ریلیز و سوشل میڈیا غا بیان جاری کرسا حالیت آتا وضاحت کرے و حکومت اونا سختی اٹ نوٹس ءِ ہلک۔ داباندات ءِ فوج اتون گنڈنگ سراسر غلط و بے بنداو ءِ، اگہ ہندن ءُ ہیت اس مسکہ تو خیبرپختونخوا حکومت نا کنڈآن منشااٹ ہمپوک آتیکن چار ارب روپئی انت اکن تخنگانے؟ اوپارے کہ ہراتم موسم نا شدت مریک تو ہرسال ہموکان ہمپنگ نا چرجوئی بناکیک۔ بنجائی وزیر حوالکاری خیبرپختونخوا حکومت ءِ مشورہ تس کہ او برانز نا سیاست کننگ نا جاگہ غا السی ویل آتا ایسری آ چکار کے، برانز نا کال تے بنسا الس ژند مسنے و مخلوق داسہ آسراتی ، امن وایمنی و گچین زند اناآب خواہک۔ اوپارے کہ صوبائی حکومت  سیف سٹیز ڈٹ، سی ٹی ڈی فورس، فارنزیک لیبز نا جوڑ کننگ، دہشت گردی نا چٹفنگ و جان جوڑی و راجی بشخ اٹی گچینی کن وسیلہ غاتے کاریم اٹ اتے۔ اوپارے کہ خیبرپختونخوا نا غیرتی الس داہیت انا حقدار ءِ کہ اوفتے ہم ہمو زند انا آب دوئی مرے ہرا ملک انا ایلو صوبہ غاتیٹی ارے۔ بنجائی وزیر حوالکاری پارے کہ بروک آ گچین کاری تیٹی فیصلہ برانز نا بنداو آ آخا بلکن السی خذمت نا بنداو آ مریک ہندا سوب آن الس نا خذمت ءِ اولیت تننگے۔