ملتان نا تاریخی میرات آتا بحالی ٹی اٹلی نا کڑد ستاکڑزک، سید یوسف رضاگیلانی

ملتان۔ 25 جنوری (اے پی پی) چیئرمین سینیٹ سید یوسف رضاگیلانی پاکستان اٹ تعینات اٹلی نا سفیر مریلینا ارمیلن نا اعزاز اٹی سوارہ اس تس۔ سوارہ غان مست  چیئرمین سینیٹ و اطالوی ڈل انا نیام اٹ اوڑدہی مس، ہراٹی پاکستان و اٹلی نا نیام اٹ دوستانہ تعلقداری ، زرگزرانی کمکاری، راجی رابطہ و تاریخی میرات آتا رکھ آ سرجمی اٹ گپ وتران کننگا۔ اوڑدہی ٹی اطالوی سفیر مریلینا آرمیلن آن بیدس ڈومینیکو پولونی و آگسٹو پالمیری ئسک ہم ساڑی ئسر۔ داوخت آ سید یوسف رضاگیلانی ملتان نا تاریخی حیثیت نا بحالی کن اٹلی نا کنڈآن تروک آ کمکاری نا ستاءِ کرسا پارے کہ اٹلی نا کمکاری آن ملتان نا چندی تاریخی درگہ غاتا بحالی ممکن مس، ہرا شار انا متکن آ تہذیب و دودوربیدہ ئی شناخت نا اہم بشخ ءِ۔ اوپارے کہ ملتان و روم انا تاریخی رابطہ ہڑتوم آملک آتا تعلقداری تے پین سوگو بنداو فراوان کیک۔ اطالوی سفیر مریلینا آرمیلن گپ وتران اٹی پارے کہ اٹلی پاکستان آن افرادی قوت دوئی کننگ نا خواہندار ءِ۔ سُوارہ ٹی قومی اسمبلی نا باسک سید عبدالقادر گیلانی ، صوبائی اسمبلی نا باسک سید علی حیدر گیلانی، مخدوم سید ابوالحسن گیلانی سجادہ نشین  دربار حضرت موسیٰ پاک شہید، صدر ملتان چیمبر آف کامرس اینڈ انڈسٹری بختاور تنویر، مسکوہی ایم پی اے مجتبیٰ گیلانی، صنعت کار چوہدری ذوالفقار انجم، خواجہ انیس  تون اوار ایلو اہم شخصیت آک بشخ ہلکر۔ بشخ ہلوک آک پاکستان و اٹلی نا نیام اٹ ہڑتوم آ کنڈآتا تعلقداری ، دودوربیدہ ئی میرات نا رکھ، زرگزرانی شریداری و افرادی قوت نا ہل وتس ءِ پین مون آ دننگ نا گرج آ زور شاغار۔