بنجائی وزیر  عبدالعلیم خان نا برف اٹی شاہراہ تے ملوک تخنگ آ این ایچ اے ٹیم تے خراج تحسین

اسلام آباد۔ 25 جنوری (اے پی پی) بنجائی وزیر مواصلات عبدالعلیم خان برف و مشکل موسمی حالیت آتیان پد ہم قومی شاہراہ تے ٹریفک کن فعال تخنگ آ نیشنل ہائی وے اتھارٹی (این ایچ اے) نا ٹیم تا کارکڑد نا پبی وڑاٹ ستاءِ کرینے۔ یک شنبے نادے آ تینا بیان اٹی اوپارے کہ این ایچ اے نا عملہ وخت آ گام گیج آتا کمک اٹ الس نا آسراتی کن شاہراہ تا بے سلنگ رسینگ ءِ پک کرسا اسہ مثال اس قائم کرینے۔ بنجائی وزیر عبدالعلیم خان مری، چترال ، بلوچستان ، گلگت بلتستان و آزاد کشمیر کون آ سخت انگا علاقہ غاتیٹی فرض سرتروک آ فیلڈ اسٹاف ءِ خصوصی وڑاٹ خراج تحسین پیش کرے۔ اوپارے کہ این ایچ اے نا عملہ و خواری کش ورکرآک شاہراہ تا بحالی کن ننا اصل میرات آک ءُ۔ اوپارے کہ مری ایکسپریس وے و ایلو اہم شاہراہ تیا بے چٹ تننگ و پوسکن آمشینری نا وخت آ کاریم اٹ اتنگ آن نئے بیرہ ٹریفک نا روانی برقرار سلیس بلکن شکست آتا توننگ ہم ممکن مس۔ عبدالعلیم خان مچ آملک اٹی برف انا بروک آ ریسہ نا چرجوئی ٹی این ایچ اے ءِ پورو وڑاٹ تیار و ہائی الرٹ سلنگ نا پرمان کرینے۔ اوداہیت آ زور شاغا کہ الس نا آسراتی کن شاہراہ تیا رکھوک رسینگ فراوان کننگ ننا قومی زمواری ءِ۔ بنجائی وزیر مسافر و سیل و سواتی تیان ہم خواست کرے کہ او مشکل کسر تیا سفر اٹی این ایچ اے نا فیلڈ اسٹاف تون پورو کمکاری ءِ پک کیر تانکہ ناخوشگوار حالیت آتیان بچنگ مرے۔