پاکستان علماء کونسل نا اوغانستان اٹی مبینہ راجی پرخ آ گڑتی نا درشان

اسلام آباد۔ 25 جنوری (اے پی پی) پاکستان علماء کونسل اوغانستان اٹی مبینہ وڑاٹ شریعت نا پن آ راج ءِ چندی راجی تپہ غاتیٹی بشخنگ نا حوال آتیا گڑتی نا درشانی ءِ کرسا پارینے کہ داوڑنا گام گیج آک قرآنِ کریم، سنتِ رسول صلی اللہ علیہ و آلہ وسلم و اسلامی تعلیمات آتا سراسر منافی ءُ۔ پاکستان علماء کونسل نا کنڈآن شنبے نادے آ جاری اسیجائی بیان اٹی حافظ محمد طاہر محمود اشرفی نا کماشی ٹی عالم دین بشمول مولانا نعمان حاشر، مولانا محمد شفیع قاسمی، مولانا حافظ مقبول احمد، علامہ طاہر الحسن، مولانا طاہر عقیل اعوان، مولانا عزیز اکبر قاسمی، مولانا محمد اشفاق پتافی و ایلوفک خبڑدار کرینو کہ اسلام نا پن آ راج ءِ‘‘آجو’’ و ‘‘غلام ’’کون آ تپہ غاتیٹی بشخنگ نا گنجائشت اس نئے قرآن اٹی ارے و نئے ہی سنت نبوی صلی اللہ علیہ و آلہ وسلم اٹی۔ عالم دینک پیدوار کریر کہ داوڑنا درجہ بندی اسلامی تعلیمات آتیان قطعی وڑاٹ متصاد م ءِ و اونا تعلق اسلام آن مست یا غیر اسلامی راجی نظام آتون ملک، ہراڑے انسان تے ودی مننگ، حیثیت یانسل انا بنداو آ چندی تپہ غاتیٹی بشخنگاکہ۔ اوپارے کہ اسلام نبی اکرم صلی اللہ علیہ و آلہ وسلم نا بعثت آن پد ہروڑنا غلامی و نسلی و تپہ ئی برتری ءِ مدامی کن چٹفے۔ اوغانستان نا حالیت آتا حوالہ ءِ ترسا پاکستان علماء کونسل اوغان طالبان کمامدار  ہرا تینے اسلامی و شریعت آ تالان حکومت گوندرہ ، آن خواست کرینے کہ او دا باندات آتیا دمدستی وڑاٹ تینا پیدوار موقف ءِ جہانی برادری نا مون آ تخر۔ کونسل اسلام نا پن آ جاہلیت نا دور اتون وابستہ رسم و روایت آتا احیاء نا برخلاف سخت تنبیہ ہم کرے۔