پاکستان گچین، مدبر و دوراندیش سفارتکاری نا کمک اٹ واشنگٹن اٹی تینے اسہ پت انا قابل و المی شریدار اسے نا وڑاٹ دُوارہ منفینے، ڈاکٹر طارق فضل چوہدری

اسلام آباد۔ 25 جنوری (اے پی پی) بنجائی وزیر پارلیمانی امور ڈاکٹر طارق فضل چوہدری پارینے کہ پاکستان گچین، مدبر و دوراندیش سفارتکاری نا کمک اٹ واشنگٹن اٹی تینے اسہ پت انا قابل و المی شریدار اسے نا وڑاٹ دُوارہ منفینے۔ شنبے نادے آ ایکس آ تینا اسہ پوسٹ اسے ٹی بنجائی وزیرپارے کہ جہانی جریدہ دی ڈپلومیٹ نا رداٹ پاکستان علاقائی بے چیٹی ءِ اسہ بھلا جہانی سفارتی موقع ٹی بدل کرسا امریکہ تون تعلقداری تے پوسکن ءُ سمت اس تسنے۔ چاردے ئی پاک بھارت  جنگ آن پد صدر ٹرمپ نا پاکستانی آرمی چیف ءِ وائٹ ہاؤس آ سلہ، وزیراعظم محمد شہباز شریف نا بڑزکو کہولی دورہ، انسداد دہشت گردی کمکاری نا بحالی، ٹیرف اٹی کمتی، امریکی زرکاری، تیل انا کوڑی تا شونداری، ایف۔ 16اپ گریڈ پیکج و اسٹریٹجک اقتصادی رابطہ، داغٹ پاکستان نا سرسہب خارجہ پالیسی تا پیدوار شاہدی ءُ۔ اوپارے کہ ایڑے بھارت ثالثی ءِ مسترد کننگ آن پد سفارتی تنیائی ، بھلو امریکی ٹیرف و واپاری نسخان تا گواچی مسنے وخت اس کہ پاکستان جہانی سیاست اٹی تینا اسٹریٹجک اہمیت ءِ پوسکن آ بڑزی تسکان درینے۔ بنجائی وزیر ڈاکٹر طارق فضل چوہدری پارے کہ پاکستان دانشمندانہ سفارتکاری علاقائی چیلنج آتے جہانی سرسہبی ٹی بدل کننگ نا روشنا درور ءِ۔