راولپنڈی نا ورناگوازی گر آتیاتالان‘‘راولپنڈی ٹائیگرز‘‘ نا پن اٹ اسہ کرکٹ ٹیم اس جوڑ کننگ انگ ءِ، بنجائی وزیر ریلوائی محمد حنیف عباسی

راولپنڈی۔ 24 جنوری (اے پی پی) بنجائی وزیر ریلوائی محمد حنیف عباسی پڑو کرینے کہ راولپنڈی نا ورناگوازی گر آتیا تالان ‘‘راولپنڈی ٹائیگرز’’ نا پن اٹ اسہ کرکٹ ٹیم اس جوڑ کننگ انگ ءِ دامسخت کن لاہور قلندر نا کنڈآن 14 و 15 فروری آ راولپنڈی ڈسٹرکٹ اٹی ورناتیکن ٹرائلز اڈتننگک ہرا پورو وڑاٹ میرٹ نا بنداو آمریک ۔ داخیال آتا درشانیءِ او تدوک آ دے راولپنڈی ٹی سی ای او لاہور قلندر عاطف رانا تون اوار پریس کانفرنس اٹی کرے۔ بنجائی وزیرپارے کہ راولپنڈی ٹائیگرز ءِ جہانی آب انا ٹیم جوڑ کننگ کن پبی گام گیج کننگک۔ اوپارے کہ ٹرائل آتیٹی ہچ ءُ سفارش اسے منپنہ و بشخ ہلنگ کن راولپنڈی نا ڈومیسائل مننگ المی مریک۔ اسہ سوج اسے نا ورندی ٹی حنیف عباسی پارے کہ مسلم لیگ (ن) نا حکومت نا اولیت آتیٹی ورناتا تعلیم تون اوار اوار اوفتے گوازی تا جہانی آب انا آسراتی فراوان کننگ اوار ءِ۔ اوپارے کہ راولپنڈی ٹی اسکول و کالج آتیٹی گوازی تا آب اٹ آسراتی فراوان کننگاسس ولے تدوک آ حکومت دا ڈٹ آتے نسخان تس۔ عاطف رانا پارے کہ داسہ راولپنڈی نا لائخ ورناتا ٹرائل کن ٹیم شار اٹی بریک و کوشست مریک کہ 14و15 فروری آ ہی ٹرائل ءِ پورو کننگے۔ اوپارے کہ لاہور قلندرز نا برانڈ ایمبیسیڈر راولپنڈی نا ہر گلی محلہ و کلب آ ہنسا ورناتے ٹرائلز اٹی بشخ ہلنگ نا سلہ خلیک۔ اونا پاننگ ئس کہ کوشست کننگک کہ دا ٹرائل آتیان کم از کم اِرا گوازی گر پی ایس ایل اٹی اوار مننگ کے وخت اس کہ غٹ ریسہ غاتیٹی میرٹ ءِ پک کننگے۔