آئی سی سی ٹی ٹوئنٹی ورلڈ کپ اٹی بشخ ہلنگ نا بابت گڈیکو فیصلہ ءِ حکومت پاکستان کیک، محسن نقوی

لاہور۔ 24 جنوری (اے پی پی) پاکستان کرکٹ بورڈ انا چیئرمین محسن نقوی پارینے کہ آئی سی سی ٹی ٹوئنٹی ورلڈ کپ اٹی بشخ ہلنگ نا بابت گڈیکو فیصلہ ءِ حکومت پاکستان کیک، پی سی بی آئی سی سی آن زیات حکومت پاکستان نا فیصلہ غاتا پابندءِ۔ لاہور اٹی میڈیا تون گپ وتران کرسا محسن نقوی ناپاننگ ئس کہ ورلڈ کپ اٹی بشخ ہلنگ نا بابت گڈیکو فیصلہ کن وزیراعظم پاکستان نا پدی بننگ نا چاری اُن۔ اوپارے کہ حکومت نا کنڈآن فیصلہ بننگ تون پلان اے، بی و سی تیار ءِ۔ چیئرمین پی سی بی بنگلہ دیش نا باندات آ ہیت کرسا پارے کہ بنگلہ دیش تون زیاتی مننگ ءِ، اوٹی ٹوئنٹی ورلڈ کپ اٹ بایدے اوار مرے۔ اونا پاننگ ئس کہ بنگلہ دیش آئی سی سی ٹی بریبر نا حیثیت تخک، اگہ پاکستان نا باندات اٹی بھارت ءِ آسودہی تننگ مریک تو ہندا حق بنگلہ دیش ءِ ہم بایدے ملے۔ اسہ سوج اسے نا ورندی ٹی اونا پاننگ ئس کہ 10 مئی آ ہم اسہ فیصلہ اس کننگاسس، اوکان پد دا ہُننگ تو کہ مون آانت مریک۔ کرکٹ نا بابت ایلو ڈٹ آتیا ہیت کرسا چیئرمین پی سی بی پارے کہ ایون الس کن باقاعدہ مرچنڈائزنگ شاپ انا بناءِ کننگانے وخت اس کہ ہندا وڑانا مرچنڈ ائزنگ شاپ کراچی و ایلو شار تیٹی ہم جوڑ کننگک۔ اوپارے کہ پنجاب حکومت قذافی اسٹیڈیم و اونا چارمہ کنڈ ءِ زیبا جوڑ کننگ کن پبی گام گیج کننگ ءِ، چیف سیکرٹری پنجاب زاہد زمان قذافی اسٹیڈیم نا کیبی نا زیبائی کن جوان ءُ ڈٹ اس تیارکرینے۔ وادی سون اٹی کرکٹ اسٹیڈیم نا تفنگ آ ہم کاریم نا بناءِ کننگ انگ ءِ۔ محسن نقوی پارے کہ پنجاب حکومت ، پاکستان کرکٹ بورڈ اتون اواری اٹ لوکل کہول آ کرکٹ ٹیم جوڑ کیک و کرکٹ نا گچینی کن عملی گام گیج کننگک۔ صحافی تا بابت گپ وتران کرسا محسن نقوی پڑوکرے کہ بنجائی وزیر حوالکاری تون اواری اٹ اسہ ڈٹ اس جوڑ کننگانے ، ہرانا رداٹ مچ آملک انا صحافی تے اسلام آباد اٹی پلاٹ تننگک۔ اوپارے کہ دا ڈٹ آ وزیر حوالکاری و سی ڈی اے اواری اٹ کاریم کننگ ءُ، وزیر حوالکاری دا ڈٹ اٹی خاص است خواہی ہلنگ ءِ۔ کرکٹرز آتون مبینہ فراڈ نا بابت سوج آ محسن نقوی پارے کہ دا باندات ا داسکان اوڑتون کس اس رابطہ کتنے، ولے ہراتم کرکٹرآک رابطہ کیرہ تو باندات ءِ ضرور ہُننگک۔