چیئرمین پاکستان کرکٹ بورڈ محسن نقوی دی پی سی بی شاپ نا بناءِ کرے

لاہور۔ 24 جنوری (اے پی پی) چیئرمین پاکستان کرکٹ بورڈ (پی سی بی) محسن نقوی لاہور اٹی جوڑ دی پی سی بی شاپ نا باقاعدہ بناءِ کرے۔ داوخت آ او شاپ انا دورہ ءِ کرے و ہموڑے ساڑی چندی کرکٹ کٹس، گوازی گر آتا سائن مروک بیٹس و ایلو یات گاری گڑاتے ہرا۔ محسن نقوی کرکٹ نا بابت آب اٹ کٹس، ٹریک سوٹ و ایلو گڑاتیٹی بھاز است خواہی نا درشانی ءِ کرسا پارت کرے کہ شاپ اٹی زالبول و چناتیکن جتا سیکشن اس جوڑ کننگے تانکہ غٹ شاریک آسانی اٹ ہلنگ کیر۔ چیئرمین پی سی بی شاری تا آسراتی تا رداٹ دی پی سی بی شاپ انا وخت ءُ پاس ءِ نن نا 8 بجہ غان ودفنگ نا پارت ہم جاری کرے۔ اوپارے کہ کراچی و ایلو بھلا شار تیٹی ہم ہندا وڑنا سووینئر شاپ جوڑ کننگک۔ ہراڑے شونقیک کرکٹ بیٹس، کٹس و ایلو کرکرکٹ گڑاتے ہلنگ کیر۔ بنائی دود اٹی چیف سیکرٹری پنجاب ، انسپکٹر جنرل پولیس پنجاب ، اٹارنی جنرل، چیف آپریٹنگ آفیسر پی سی بی، چیف ایگزیکٹیو آفیسر پی ایس ایل، ڈائریکٹر میڈیا پی سی بی، پی سی بی بورڈ انا باسک مصطفیٰ رمدے، بلال افضل تون اوار ایلو عہدیدار آک ہم ساڑی ئسر۔