استاد آک تعلیمی نظام اٹی مخ انا ملی ءُ، قوم تا عروج و زوال استاد آتا قوت تون وابستہ ءِ، چیئرمین سینیٹ

ملتان۔ 24 جنوری (اے پی پی) چیئرمین سینیٹ سید یوسف رضاگیلانی پارینے کہ پاکستان نا آخبت داہیت اتون گنڈوک ءِ کہ ملک تینا ورناتے ہراحداسکان گچین و آب اٹ تعلیم فراوان کیک۔ ورناآبادی و بے پناہ لائخی تخوک پاکستان نا سرسہبی نا دارومدار جامعہ غاتا آب آٹی ءِ۔ او ہفتہ نا دے جناح آڈیٹوریم بہاؤالدین زکریا یونیورسٹی ٹی اکیڈمک اسٹاف ایسوسی ایشن (اے ایس اے) نا ایگزیکٹیو باڈی نا سوغندی دود آن تران کریکہ۔ اوپارے کہ جامعہ غاک تینا تینا ڈیہہ تیٹی تعلیم، پٹ وپول، جدت و راجی زمواری نا ہند آتا وڑاٹ بایدے کاریم کیر۔ چیئرمین سینیٹ پارے کہ او بطور چیئرمین سینیٹ پارلیمانی فورم آ تعلیم ءِ قومی پالیسی سازی مرکزی تمبہ گوندسا کرینے۔ اونصاب اٹی اصلاحات ، تعلیم ءِ پوسکن جاب مارکیٹ نا گرج آتون ہم گرنچ کننگ و پاکستانی جامعہ غاتا جہانی شہرت یافتہ ادارہ غاتون رابطہ غاتے سوگو کننگ آ زور شاغا۔ سید یوسف رضاگیلانی استاد و اکیڈمک اسٹاف ءِ تعلیمی نظام نا مخ اناملی گوندسا پارے کہ قوم تا عروج و زوال استاد آتا قوت تون وابستہ ءِ۔ اوپارے کہ اکیڈمک اسٹاف ایسوسی ایشن کسبی حق انا رکھ اتون اوار اوارتعلیمی آب، ادارہ جاتی ہم گرنچی و فکری آجوئی نا مون آ دننگ اٹ اہم کڑد ادا کیک۔ چیئرمین سینیٹ سویلی پنجاب و مچ آملک اٹی آب اٹ تعلیم نا مون آ دننگ اٹ بی زیڈ یونا کڑد اناستا ءِ کرسا پنجاب حکومت آن خواست کرے کہ شجاع آباد اٹی بہاؤالدین زکریایونیورسٹی نا کیمپس اس جوڑ کننگے۔ اوپارے کہ داکیمپس آن شجاع آباد ، جلالپور پیروالا، لیاقت پور، علی پور و لودھراں و کیبی نا طالب علم آتے براہ راست فائدہ مریک۔ اواومیت ظاہر کرے کہ وزیراعلیٰ پنجاب مریم نواز دا خواست انا بلاتاخیر منظوری ءِ ایتک۔ اویات ترفے کہ بہاؤالدین زکریایونیورسٹی 1975 اٹی مسکوہی وزیراعظم شہید ذوالفقار علی بھٹو نا دور اٹی پارلیمنٹ نا ایکٹ انا کمک اٹ جوڑ کننگا، وخت اس کہ ہندا فیصلہ نا رداٹ اسلامیہ یونیورسٹی بہاوالدین و گومل یونیورسٹی ڈیرہ اسماعیل خان ہم جوڑ مس۔ داسویلی علاقہ غاتیٹی بڑزکو تعلیم ءِ مون آدننگ نا اسہ دوراندیش قومی فیصلہ اس ئس، ہرانا مسخت پائیدارقومی شونداری کن تعلیمی بریبری ءِ پک کننگ ئس۔ تینا دورِ وزارت عظمیٰ(2008آن 2012) نا حوالہ ءِ ت رسا سید یوسف رضاگیلانی پارے کہ شدید زرگزرانی و سیکورٹی چیلنج آتیان پد ہم سرکاری جامعہ غاتے سوگو کننگ و پدسلوک آ علاقہ غاتیٹی بڑزکو تعلیم اسکان رسینگ ءِ ودفنگ کن پبی کوشست کننگا۔ اوپارے کہ ہندا وخت اٹی فیکلٹی ڈویلپمنٹ پروگرام نا رداٹ بی زیڈ یو ءِ 100 پی ایچ ڈی اسکالرشپ تننگا۔ اوپارے کہ اینو بہاؤالدین زکریایونیورسٹی سویلی پنجاب نا غٹ آن بھلا جامعہ ءِ ، ہرا ہزار آ طالب علم آتے تعلیم تننگ ءِ و خوان، پٹ وپول و علاقائی شونداری ٹی نمان کڑد ادا کننگ اٹی ءِ۔ چیئرمین سینیٹ داہیت انا درشانی ءِ کرے کہ تینا مچ آ زند  السی زند اٹی او تعلیم ءِ قومی شونداری، راجی انصاف و جمہوری سوگوی نا بنداو سرپند کرینے۔ اوپارے کہ تعلیم آ زرکاری ہچ ءُ خڑچ اس اف بلکن مریس مدی قومی زمواری و ریاستی اولیت ءِ۔ داوخت آ پروائس چانسلر بی زیڈ یوڈاکٹر زبیر اقبال یونیورسٹی نا درجہ بندی ٹی گچینی و تدوک آ یک ونیم سال اٹی کروک آ گام گیج آتے مون آ تخا۔ اوپارے کہ یونیورسٹی نا جم گچینی کن پنچ سالہ حکمت عملی اس تیار کننگانے۔ صدر اکیڈمک اسٹاف ایسوسی ایشن ڈاکٹر بنیامین فیکلٹی ءِ مون تروک ویل آتے تالان کرسا یونیورسٹی نا گچینی کن پبی کڑد ادا کننگ نا عزم انا درشانی ءِ کرے۔ اوچیئرمین سینیٹ نا منت واری ءِ ہرفسا اودے سویلی پنجاب و بی زیڈ یو نا محسن گوندا۔