دنیا ءِ مون تروک بھلا خطرہ غاتیٹی مس انفارمیشن ارٹ میکو ، پولرائزیشن مسٹ میکو نمبر آٹی ءِ، احسن اقبال

لاہور۔ 24 جنوری (اے پی پی) بنجائی وزیر ڈٹ بندی و شونداری احسن اقبال پارینے کہ پوسکن آ چین اٹی ڈیجیٹل ریزیلینس ودی کننگ بھاز المی ءِ، تانکہ او ڈیجیٹل ذریعہ اٹ بروک آمعلومداری تے بیدس سجفنگ آن قبول کننگ نا جاگہ غا جاچ ءِ ہلنگ کے۔ داخیال آتا درشانی ءِ او لاہور آرٹس کونسل الحمرا ٹی نہہ می تھنک فسٹ (افکارِ تازہ) ٹی اڈ ہلوک پینل ڈسکشن اٹی گپ وتران کرساکرے۔ بنجائی وزیر پارے کہ دا خطرہ غاتا مقابلہءِ کننگ کن تعلیمی نظام نا کمک اٹ ورناتیٹی تنقیدی سوچ و معلومداری ءِ ہُننگ نا لائخی ودی کننگ المی ءِ ، ہائر ایجوکیشن کمیشن ءِ پارت کننگانے کہ او جامعہ غاتے داہیت انا پابند کے کہ طالب علم آتیٹی ڈیجیٹل دور انا خواست آتا رداٹ سچا و دروغ اٹی پرخ کننگ نا اہلیت ودی کننگے۔ احسن اقبال پارے کہ ڈیجیٹلائزیشن اخس کہ اہم  مسنے، سائبر سیکورٹی ہم ہموخس اہمیت اختیار کرینے، ملک انا جغرافیائی  سیم تا رکھ آنبار ڈیجیٹل و سائبر سیم تا رکھ ہم المی ءِ۔ڈیجیٹل نظام تا ہیکنگ نئے بیرہ ریاستی ادارہ بلکن لس شاری، زرگزران وجمہوری عمل کن ہم سنگین خطرہ ودی کننگ کیک۔ اوپارے کہ اگہ ملک اسے نا ڈیجیٹل سسٹم ءِ ہیک کننگے تو اودے غلط کاریم اٹ اتنگ مریک۔ بنجائی وزیر پارے کہ دا چیلنج بیرہ قومی کہول اسکان محدود اف بلکن انفرادی کہول آ ہم داڑآن خطرہ غاتیٹی ودکی مسنے، اینو سوشل میڈیا پلیٹ فارم بندغ اسے نا نفسیات و بروک آ فیصلہ غاتا کساس اونا خڑکی رشتہ دار آتیان ہم جوان خلنگ کیک۔ اوپارے کہ بگ ڈیٹا و ٹیکنالوجی نا امتزاج جمہوریت کن ہم اسہ بھلو چیلنج اس ودی کرینے، انتئے کہ دانا کمک اٹ ووٹرز آتا سلاہ و گچین کاری فیصلہ غاتے زہمی و منظم وڑاٹ بدل کننگ مریک۔ بنجائی وزیر طالب علم آتے مخاطب کرسا پارے کہ او نیٹ فلیکس آ ساڑی فلم دی گریٹ ہیک ءِ ضرور ہریر، داڑآن دا سرپند مننگ اٹ کمک رسینگک کہ سوشل میڈیا پلیٹ  فارم ءِ ہراوڑنا مخلوق نا فیصلہ و سلاہ ءِ زہمی کننگ و اوفتے تینا مرضی نا رداٹ کننگ کن کاریم اٹ اتنگک۔ بنجائی وزیرپارے کہ ڈس انفارمیشن تالان کننگ داسہ بھاز آسان مسنے، مصنوعی ذہانت آن پد اسہ لس بندغ اسے کن دا درست کننگ بھاز مشکل مسنے کہ دا ویڈیو اصلی ءِ کہ جعلی۔ احسن اقبال پارے کہ او تینٹ ڈیجیٹل بے سگی، خار تس مواد آتا نتیجہ غاتا گواچی رہینگانے، 2018 ٹی گڑاس سیاسی ٹولیک مذہب نا کارڈ ءِ کاریم اٹ اتسا اونا برخلاف ڈس انفارمیشن و خار تس مواد تالان کریر، ہراڑآن زہمی مرسا اسہ ورناس اوڑآ قاتلانہ جلہو نا کوشست کرے۔ اوپارے کہ جلہوگیر تون اونا ہچ ءُ جندی دشمنی اس الوکہ، ولے بیرہ آن لائن خارتس مواد آن زہمی مرسا دا ورنا داگام ءِ ہرفے۔ بنجائی وزیرپارے کہ دا جلہو اٹی چلینگوک آ سم اینو ہم اونا جان اٹی ساڑی و اودے ہڑدے داہیت انا احساس ءِ ترفک کہ خار و غلط معلومداری نا مقابلہ ءِ کننگ اخس المی ءِ۔ اوپارے کہ او ورنازندان اٹی ءِ و خارتس مواد ونا زندءِ بھس کرے۔ بنجائی وزیر پارے کہ اگہ بندغ آتیٹی دروغ و سچ انا پرخ کننگ نا لائخی مف تو او آسانی اٹ غلط مسخت آتیکن کاریم اٹ برے و راج اٹ بے چیٹی نا سوب جوڑ مننگ کیک۔ او طالب علم آتے پارے کہ او سوشل میڈیا پلیٹ فارم ءِ ضرور کاریم اٹ اتیر ولے خار و تعصب نا کلہو آتیان تینے مرتخر۔ بنجائی وزیر پارے کہ انفارمیشن وار انا کمک اٹ ریاست نا تہہ ٹی شاری و ادارہ غاتانیام اٹ پت ءِ نسخان تننگ مریک ، مذہب ، لسانیت و ایلو حساس بنداو تیا راج ءِ بشخنگ مریک۔ بنجائی وزیر پارے کہ حکومت کوشست کننگ اٹی ءِ کہ سائبر کرائمزءِ کنٹرول کننگ کن حکومتی ادارہ غاتا لائخی ٹی پین ودکی کننگ مرے۔ اوپارے کہ دنیا نا چندی ملک آک دا بابت گام گیج کننگ ءُ ، آسٹریلیا 16 سال آن کم وئی نا تینا شاری تیا سوشل میڈیا نا کاریم اٹ اتنگ آ پابندی خلکنے۔