آرٹ و ڈیزن نا تعلیم ءِ قومی شونداری کن بے کچ اہم گوندنگ المیءِ، ڈاکٹر خالد مقبول صدیقی

لاہور۔ 24 جنوری (اے پی پی) بنجائی وزیر تعلیم وکسبی تربیت ڈاکٹر خالد مقبول صدیقی پارینے کہ آرٹ انا حقی خذمت نیشنل کالج آف آرٹس کون آ ادارہ غاک ہم سرتننگ ءُ۔ اوہفتہ نادے آ نیشنل کالج آف آرٹس (این سی اے) ٹی ڈگری شو انا ایسری دے دود آن تران و میڈیا تون گپ وتران کریکہ۔ بنجائی وزیرپارے کہ دا ادارہ تدوک آ یک و نیم سد سال اٹی آرٹ و تخلیقی تعلیم نا بےمٹ خذمت کرینے۔ اوپارے کہ آرٹ و ڈیزن نا تعلیم ءِ قومی شونداری کن بے کچ اہم گوندنگ المی ءِ، انتئے کہ ہندا بشخ ہر ملک انا قومی شناخت و مثبت جہانی تشخص ءِ تالان کیک۔ ڈاکٹر خالد مقبول صدیقی فائن آرٹس ، ڈیزن و آرکیٹیکچر نا بشخ آتیٹی این سی اے نا طالب علم آتا خواری، جدت و تخلیقی سوچ انا ستاءِ کرسا پارے کہ ورناک پاکستان نا روشنا و مثبت دروشم ءِ دنیا نا مون آ پیش کننگءُ۔ اوپارے کہ ڈگری شو ورناتا لائخی تے تالان کننگ و اوفتا آخبت ءِ جوڑ کننگ نا گچین پلیٹ فارم ءِ۔ بنجائی وزیرمستی پارے کہ تعلیم تون اوار اوار کسب وتخلیقی لائخی تا مون آ دننگ حکومت نا اولیت آتیٹی اوار ءِ۔ ورناتے پوسکن آ خواست آتون ہم گرنچ تعلیم فراوان کننگ وخت انا اہم گرج ءِ تانکہ او جہانی کہول آ مسابقت نا قابل جوڑ مننگ کیر۔ داوخت آ پروائس چانسلر پروفیسر ڈاکٹر مرتضیٰ جعفری فارغ مروک آ طالب علم و استاد آتے مبارکبادی ترساپارے کہ این سی اے ڈگری شو طالب علم آتا سال آتا خواری، پٹ وپول و تخلیفی سفر نا عملی درشانی ءِ۔