صدر مملکت آصف علی زرداری تون صومالیہ نا وزیر داخلہ نا اوڑدہی، سفارتی پاسپورٹ تخوک آتیکن ویزا ءِ چٹفنگ نا معاہدہ غا دستخط

اسلام آباد۔ 24 جنوری (اے پی پی) صدر مملکت آصف علی زرداری تون صومالیہ نا وزیر داخلہ علی یوسف ایوان صدر اٹی اوڑدہی کرے ہراٹی پاکستان نا ہڑتوم آ کنڈآتا تعلقداری تے سوگو کننگ نا عزم انا درشانیءِ کننگا۔ داوخت آ پاکستان و صومالیہ نا نیام اٹ سفارتی پاسپورٹ تخوک آتیکن ویزہ نا شڑت ءِ چٹفنگ نا معاہدہ غا ہم دستخط کننگا۔ ایوان صدر نا میڈیا ونگ آن ہفتہ نادے آ جاری بیان نا رداٹ معاہدہ غا صومالیہ نا وزارت خارجہ و جہانی کمکاری نا آخبتی سیکرٹری حمزہ عدن حادو و بنجائی وزیر داخلہ و انسداد منشیات نا اسپیشل سیکرٹری داؤد بڑیچ ئسک ہم دستخط کریر۔ داوخت آ صدر مملکت آصف علی زرداری پارے کہ افریقہ جہانی جغرافیائی سیاست اٹی اسہ اہم ءُ ڈیہہ اسے و پاکستان صومالیہ تون اوار افریقی ملک آتون تینا تعلقداری تے پین سوگو کننگ خواہک۔ صدر مملکت پارے کہ پاکستان صومالیہ تون تینا تعلقداری تے قدر انا نظر اٹ ہرک و اسیجائی فائدہ غاتا بشخ آتیٹی خڑکی کمکاری نا خواہندار ءِ۔ صدر مملکت آصف علی زرداری ءِ معلومدار کننگا کہ صومالیہ نا وزیر داخلہ نا دا دورہ تدوک آ 35 سال اٹی صومالیہ نا کنڈآن پاکستان نا اولیکو باضابطہ ہڑتوم آ کنڈآتا سرکاری دورہ ءِ۔ صدر مملکت داہیت آ زور شاغا کہ پاکستان جہانی ڈوہ و منشیات نا اسمگلنگ نا برخلاف علاقائی و جہانی کوشست آتیکن سنبرینگوک ءِ۔ اوڑدہی ٹی گیشتر جغرافیائی سیاسی حالیت و ہڑتوم آ کنڈآتا کمکاری نا وارخواہی تیا ہم گپ وتران مس۔ صومالیہ نا وزیر داخلہ حکومت پاکستان خاص کر وزارت داخلہ نا کنڈآن مہمانداری آ منت واری ءِ ہرفے۔ اوپارے کہ او پاکستان نا وزیر داخلہ نا سلہ غا پاکستان آ بسنے۔ اوصدر مملکت آصف علی زرداری و پاکستانی الس نا ہم منت واری ءِ ہرفے۔داوخت آ صومالیہ نا وزیر داخلہ علی یوسف صومالیہ نا صدر نا کنڈآن صدر مملکت آصف علی زرداری نا پن اسہ چٹھی اس ہم پیش کرے ہراٹی نیک است خواہی و خیرخواہی نا جوزہ غاتا درشانیءِ کننگانے و ہڑتوم آ کنڈآتا تعلقداری تے پین سوگو کننگ نا است خواہی نا درشانی ءِ کننگا۔ صومالی وزیر پاکستان ءِ صومالیہ کن اسہ پت انا قابل شریدار و ایلم ملک اس گوندا و 1990 نا دہائی ٹی صومالیہ ٹی اقوام متحدہ ناامن مشنز اٹی پاکستانی امن فوجی تا قربانی تے خراج عقیدت پیش کرے ، ہرا اقوام متحدہ نا بیرک ءِ کیرغ خذمت سرترسا تینا جان تے ندر کریر۔ اوڑدہی ٹی ہڑتوم آ فریق آک کانود نا فذ کروک آ ادارہ و کرمنل جسٹس نا بشخ اٹی کمکاری ءِ ودفنگ آ گپ و تران کریر۔ گپ وتران اٹی ہڑتوم آ کنڈآتا حوالگی معاہدہ غا مذاکرات نا گمان و ہرملک اٹی حوالگی نا کانود فریم ورک نا جاچ اوار ءِ۔ فوجداری باندات آتیٹی تین پہ تینی کانودی کمکاری و سزایافتہ بندغ آتا گدریفنگ آ گپ وتران نا بناءِ کننگ نا گمان تا ہم جاچ ءِ ہلنگا۔ ہڑتوم آفریق آک منشیات  نا برخلاف گام گیج آتیٹی کمکاری، منشیات نا اسمگلنگ و منظم ڈوہ انا برخلاف اسیجائی حکمت عملی ، معلومداری و انٹیلی جنس نا ہل وتس نیز کاریم نا کچ ءِ ودفنگ و کارندہ غاتا تربیت آ ہم امنائی سلاہ نا درشانی ءِ کریر۔ صدر مملکت ءِ معلومدار کننگاکہ پاکستان نیشنل ڈیٹا بیس اینڈ رجسٹریشن اتھارٹی (نادرا) نا کمک اٹ پوسکن ا شناختی نظام ، سول رجسٹریشن ، رکھوک دستاویزی نظام و صومالی پولیس نا تربیت نا بشخ آتیٹی کمکاری نا پیش کش کرینے۔ اوڑدہی ٹی بنجائی وزیر داخلہ منشیات تور محسن نقوی و وزیر مملکت داخلہ انسداد منشیات طلال چوہدری ئسک ہم ساڑی ئسر ۔ صومالی ڈل اٹی پاکستان اٹ صومالیہ نا سفیر شیخ نور محمد حسن و ڈپٹی پولیس چیف عثمان عبداللہی ئسک ہم اوار ئسر۔