بنجائی وزیر داخلہ محسن نقوی نا امریکی سفیر نٹالی بیکر تون اوڑدہی، غیرکانودی امیگریشن ءِ توننگ و سیکورٹی کمکاری ءِ سوگو کننگ نا بارواٹی گپ وتران

اسلام آباد۔ 24 جنوری (اے پی پی) بنجائی وزیر داخلہ محسن نقوی پاکستان اٹی امریکی سفیر نٹالی بیکر تون اہم اوڑدہی کرے، ہراٹی فریق آک تین پہ تینی است خواہی نا بشخ آتیٹی کمکاری ءِ ودفنگ و پاک امریکہ تعلقداری تے سوگو کننگ آ گپ وتران کریر۔ وزارت داخلہ نا رداٹ اوڑدہی ٹی تین پہ تینی کمکاری ءِ ودفنگ خاص کر غیرکانودی امیگریشن ءِ توننگ و پری امیگریشن کلیئرنس سسٹم ءِ گچین کننگ آ ہم سرجمی اٹ گپ وتران کریر۔ فریق آک کانود نافذ کروک آ ادارہ خاص کر پولیس کن ہر کہول آ کمکاری ءِ ودفنگ آ ہم امنا کریر۔ دیوان اٹی اسہ اہم ءُ فیصلہ اس کننگا کہ جعلی ویزا سرجز آتیٹی اوار نیٹ ورک آتا برخلاف جوان ایس او پی تا رداٹ اسیجائی کارروائی تا بناءِ کننگے۔ بنجائی وزیر محسن نقوی داہیت انا درشانی ءِ کرے کہ حکومت ایجنٹ مافیا و غیرکانودی ہن وبرءِ آسراتی فراوان کروک آتا برخلاف ‘‘زیروٹالرنس  پالیسی ‘‘ ءِ تینا کرینے۔ او داچرجوئی ٹی امریکی مخ تفی نا ستاءِ کرے۔ محسن نقوی پارے کہ ای جندی وڑاٹ جعلی ویزا نیٹ ورک آتا برخلاف کارروائی تا چاروکی ءِ کننگ اُٹ۔ اومستی پارے کہ پاکستان نا پاسپورٹ ءِ پوسکن آ ٹیکنالوجی نا کمک اٹ فول پروف جوڑ کننگانے۔ غیرکانودی امیگریشن ءِ اسہ سنگین ویل اس گوندسا اوپارے کہ غیرکانودی وڑاٹ امریکہ غا سرمننگ نا کوشست کروک آ تابرخلاف حکومت نا سخت کریک ڈاؤن برجاءِ۔ محسن نقوی پارے کہ گچین حکومتی گام گیج آتیٹی غیرکانودی امیگریشن اٹی 47 درسد کمتی بسنے۔ اوزور شاغسا پارے کہ جعلی دستاویز ات تیار کننگ یا آسراتی فراوان کننگ اٹ اوار بندغ آک ہچ ءُ رعایت اسے نا حقدار افس۔ امریکی سفیر نٹالی بیکر پاکستان تون تینا تعلقداری تیکن واشنگٹن نا عزم انا درشانی ءِ کرے۔ اوپارے کہ نن پاکستان تون تینا تعلقداری تے خاص اوہمیت ایتنہ، ننا اولیت آک ہم گرنچ ءُ و تین پہ تینی کمکاریءِ ودفنگ آن ننا تعلقداریک پین سوگو مریرہ۔