چیئرمین سینیٹ نا چترال اٹی برفانی کرود آتا تمنگ نا است ہسون واقعہ غا است ہسونی نا درشان

اسلام آباد۔ 24 جنوری (اے پی پی) چیئرمین سینیٹ پاکستان سید یوسف رضاگیلانی چترال اٹی برف انا سوب آن برفانی کرود آتا تمنگ آن اسہ ہی خاہوت نا 9 بندغ آتا زوال کننگ نا است ہسون واقعہ غا است ہسونی نا درشانی ءِ کرینے۔ سینیٹ سیکرٹریٹ نا کنڈآن ہفتہ نادے آ ہڑزخواہی بیان اٹی چیئرمین سینیٹ دا است ہسون سانحہ غا ہڑزخواہی نا درشانی ءِ کرسا پارے کہ او غم انا داساہت اٹی پدسلوک آ خاہوت نا ڈکھیائی ٹی بریبر نا شریک ءِ۔ اوپارے کہ دا اسہ بھاز است ہسون و تکلیف دہ سانحہ سے ہرا مچ آ قوم ءِ رنجیدہ کرینے۔ سید یوسف رضاگیلانی مشکل حالیت آتیٹی الس تون پورو یکجہتی و ہرممکن کمکاری نا عزم انا درشانی ءِ کرسا تعلقدار کمامدار آتے پارت کرے کہ بر ف آن زہمی علاقہ غاتیٹی کمکی کارروائی دمدستی ، گچین و بلاتاخیر پک کننگے۔ چیئرمین سینیٹ پارے کہ مشکل حالیت آتیٹی الس ءِ تنیا اِلنگ پننگک۔ اوشاہراہ تا دمدستی بحالی ، بجلی و مواصلاتی نظام نا سہی کننگ و طبی آسراتی تا وخت آ فراوانی کن غٹ دوئی وسیلہ غاتے کاریم اٹ اتنگ نا پارت کرے۔ داکان بیدس چیئرمین سینیٹ ضلعی انتظامیہ و ریسکیو ادارہ غاتے ہردم چوکنا و تیار سلنگ نا پارت کرساپارے کہ زہمی علاقہ غاتیٹی خور، دوائی و ایندھن نا پدریسہ و بے سلنگ فراوانی ءِ ہر حال اٹ پک کننگے۔ ایسر اٹی چیئرمین سینیٹ سید یوسف رضاگیلانی اللہ تعالیٰ آن زوال کروک آ بندغ آتا درجہ غاتا بڑزی و خاہوت کن صبر وجمیل نا دعاکرے۔