مہاراجہ رنجیت سنگھ انا دور انا میرات ہندی ذہانت و کسب انا ڈیک ءِ، مرتضیٰ سولنگی

لاہور۔ 24 جنوری (اے پی پی) صدر مملکت نا ترجمان مرتضیٰ سولنگی پارینے کہ مہاراجہ رنجیت سنگھ انا دور انا میرات ہندی ذہانت و کسب نا عکاسی ءِ کیک، دا نمائش نا اڈتننگ ڈاکٹر نادرا و ڈاکٹر مرتضیٰ تاج انا بھلو کارنامہ اسے۔ داخیال آتا درشانی ءِ او لاہور آرٹس کونسل الحمرا ٹی نہہ می تھنک فسٹ (افکارِ تازہ) ٹی اڈ ہلوک نمائش آن تران کرسا کرے۔ مرتضیٰ سولنگی پارے کہ نمائش اٹی ساڑی آ نوادرات آک ہندی کسب نا شاہکار ءُ، نوادرا ت لٹ و پُل آخا بلکن ہندی کسب نا زندہ درور ءِ۔ اوپارے کہ پنجاب نا کاری گر آتا مہارت تاریخی میرات ءِ، سلہہ، سکہ ، زیور و گاڈی غٹ ہندی دستکاری نا زندہ درور آک ءُ۔ مرتضیٰ سولنگی مستی پارے کہ کنے داڑے پنجابی ٹی ہیت کروئی مروسس، ولے گڑاس سنگت آتے اردو و پنجابی سمجھ بفک۔ اوپارے کہ مہاراجہ رنجیت سنگھ انا نمائش ءِ ہُننگ آن بیدس اصل تاریخ ءِ پہہ مننگ ممکن اف، مہاراجہ رنجیت سنگھ انا دور نسبتاََ سیکولر ئس، اوٹی ایلو مذہب آتا مخلوق ہم اہم عہدہ غاتیا تعینات ئسر۔ تاریخی دستکاری آن ود حکمرانی نا مڈل سجفنگ نا قابل ءِ۔ اوپارے کہ دا نمائش انا اڈتننگ ڈاکٹر نادرا و ڈاکٹر مرتضیٰ تاج انا بھلو کارنامہ اسے انتئے کہ داڑآن مہاراجہ رنجیت سنگھ انا دور حکومت ءِ پہہ مننگ اٹی آسانی و داڑآن خاص کر ورناتے تاریخ ءِ پہہ مننگ اٹی کمک رسینگک۔