بحری بشخ ءِ اصلاحات آن پد 100 ارب روپئی کٹیا مس، بنجائی وزیر بحری امور محمد جنید انوار چوہدری

اسلام آباد۔ 24 جنوری (اے پی پی) بنجائی وزیر بحری امور محمد جنید انوار چوہدری پارینے کہ بحری بشخ تدوک آ سال ریکارڈ 100 ارب روپئی کٹیا دوئی کرینے ہرا اسہ سال انا گیشتر اصلاحات آن پد ممکن مس، اصلاحات آن بندرگاہ تا کارکڑد اٹی گچینی، خڑچ آتیٹی کمتی و  بھلو وخت اسے آن پدتموک پالیسی تے گڈیکو دروشم اس تننگ اٹ کمک رسینگا، ہراڑآن پاکستان علاقائی واپاری و لاجسٹک مرکز نا وڑاٹ سوگو مس۔ وزارت بحری امور نا رداٹ بنجائی وزیر وزارت نا سالانہ کارکڑد رپورٹ ءِ پیش کرسا 2025 ءِ‘‘بدلی نا سال’’ گوندا وپارے کہ داٹی کانود سازی، ڈیجیٹائزیشن ، انفراسٹرکچر نا شونداری و انسانی وسیلہ غاتا بشخ اٹی اِرا درزن آن زیات گام گیج کننگا۔ جنید انوار چوہدری پارے کہ دا اصلاحات بندرگاہ، شپنگ و ماہی گیری نا بشخ ءِ پوسکن کرسا سمندری زرگزران نا کچ ءِ ودفنگ ءِ۔ اوپارے کہ پاکستان تینا ریگولیٹری فریم ورک جہانی آب انا رداٹ شاغانے، ہراٹی انٹرنیشنل میرٹائم آرگنائزیشن و ہانگ کانگ کنونشن شپ ری سائیکلنگ اوار ءِ۔ وزیرپارے کہ قومی بحری پالیسی نا منظوری اسہ اہم ءُ گام اسے ، ہراشپنگ، بندرگاہ، ماہی گیری و بحری سلامتی ءِ اسہ ہی فریم ورک اسے ٹی اتیک تانکہ پائیدار شونداری ءِ پک کننگ مرے۔ اومستی پارے کہ قومی شپنگ پالیسی نا رداٹ پاکستان نا شپنگ سیکٹر ءِ ودفنگک و درملکی کیریئرز آ سیبو ءِ کم کننگک، وخت اس کہ قومی ماہی گیری و آبی کشت وکشار نا پالیسی نا ہدف سالانہ 2 ارب ڈالر نا برآمدات و کرکی کمیونٹی تیٹی کم و ود اِرا لکھ روزگار نا وارخواہی ودی کننگ ءِ۔ اوپارے کہ کراچی پورٹ 54 ملین ٹن کارگو ہینڈل کرسا ریکارڈ اس جوڑ کرے و اوسط جہاز قیام انا وخت اٹی 24 آن 36 گھنٹہ نا کمتی کننگا، وخت اس کہ خڑچ آتیٹی کمتی نا گام گیج آن ماہانہ ارب آ روپئی نا بچت مس۔ کراچی و پورٹ قاسم کم و ود 150 ایکڑ کوزہ مروک ڈغار تے پدی دوئی کرے، و اولیکو وار بنکرنگ نا آسراتی ءِ جوڑ کننگا ہراڑآن درملکی زرمبادلہ نا بچت و ٹرانس شپمنٹ ٹریفک اٹی ودکی مریک۔ جنید انوار چوہدری پارے کہ پاکستان اٹی اولیکو وار مسافر و مال برداری کن فیری سروس نا بناءِ کننگا، گوادر نا ڈیپ سی پورٹ اٹی 100 ایکڑ آ آف ڈوک ٹرمینل کن بولی طلب کننگانے تانکہ نیامی ایشیا و ایلو ڈیہہ آتون واپاری تعلقداری سوگو مرے۔ وزیر بحری امور ‘‘سی ٹو اسٹیل ’’ ڈٹ انا بابت گپ وتران کرسا پارے کہ پورٹ قاسم آ جہاز انا ری سائیکلنگ ءِ ملکی اسٹیل نا پیدوار تون مربوط کننگک، ہراڑآن درآمدات کم ، زرگزران ءِ مون آ دننگ و پاکستان اسٹیل ملز انا بحالی ممکن مریک۔ اوپارے کہ وزارت بحری امور 100  درسد ای۔ آفس نا نافذ کننگ نا کمک اٹ کاغدی نظام ءِ چٹفے۔ پاکستان سنگل ونڈوءِ پورٹ کمیونٹی سسٹم تون مربوط کرے و تعلیمی وراجی شونداری کن ہم گام گیج کننگا، ہرافتے ٹی پاکستان میرین اکیڈمی ءِ ڈگری تننگ نا مجاز و کرکی کمیونٹی نا چناتیکن اینڈاؤمنٹ فنڈ انا رداٹ تعلیمی وظیفہ اوار ءِ۔