حکومت تعلیم نا نظام ءِ گچین و ورناتے واکدار کننگ کن چندی پروگرام تا کمک اٹ خصوصی چکار کننگ ءِ، وزیراعظم محمد شبہاز شریف نا جہانی یوم تعلیم آ کلہو

اسلام آباد۔ 24جنوری (اے پی پی) وزیراعظم محمد شہباز شریف تعلیم و تربیت نا بشخ اتون وابستہ بندغ آتے خراج تحسین پیش کرسا پارینے کہ پاکستان نا لائخ آ ورناک ننا میرات ءُ ہرافتے تعلیم، تربیت و کسبکاری نا گچین وارخواہی فراوان کننگ حکومت نا اولیت آتیٹی اوار ءِ۔ وزیراعظم آفس نا میڈیا ونگ انا کنڈآن جاری بیان نا رداٹ جہانی یوم تعلیم آ تینا کلہو اٹی وزیراعظم پارے کہ (اینو) ہفتہ نادے آ جہانی یوم تعلیم آ پاکستان اقوام عالم تون اوار ہم توار مرسا پبی وڑاٹ مچ آ دنیا خاص کر پاکستان نا تعلیم و تربیت تون وابستہ غٹ بندغ آتے خراج تحسین پیش کیک۔ اوپارےکہ او جندی وڑاٹ غٹ الس، خوانوک آ مار، مسن ، استاد، لمہ و باوہ ، معلم و پولکار آتے است اٹ مبارکبادی پیش کیک ہرا مچ آملک اٹی تعلیم و تربیت و علم انا مون آدننگ کن کوشست کننگ ءُ۔ وزیراعظم پارے کہ برجاسال داجہانی دے ‘‘تعلیم نا اسیجائی ٹہیفنگ اٹی ورناتا واک‘‘ نا بے کچ جوان سرحال نا رداٹ اڈتننگ انگ ءِ۔ داسرحال ننا دور اٹی ورناتپہ نا نظام تعلیم اٹی بطور اسہ فعال شریدار اس مننگ نا ترجمانی ءِ کیک، ہندن ءُ تعلیم نا نظام اس ہرا ساڑی آ دور، جدت و آخبت نا خواست آتون ہم گرنچ، جوان و گچین مرے۔ اوپارے کہ ورناتا تخلیقی لائخی و جدت آموز است خواہی پک وڑاٹ نظام تعلیم نا سہی سمت اٹی شونداری نا سوب جوڑمریک۔ اوپارے کہ پاکستان نا لائخ آ ورناآبادی ننا ملک انا نہادی میرات ءِ، اوفتے تعلیم وتربیت، آب اٹ کاریم نا کچ و کسبکاری نا گچین وارخواہی فراوان کننگ حکومت نا اولیت آتیٹی اوار ءِ، پاکستان نا آئین خاص کر آرٹیکل 25۔اے بنجائی و صوبائی حکومت آتا تعلیم نا مون آدننگ و اصلاحات نا بابت راہشونی کرسا کیک۔ اوپارےکہ ساڑی آدور انا باہم منسلک و ٹیکنالوجی آن شپ دنیا ٹی علم و تعلیم نا ساڑی آ وڑاٹی تنقیدی سوچ، جدت، ڈیجیٹل مہارت، اخلاقی قدر و عملی لائخی تے جذب کننگ اٹ ہی انفرادی و قومی آسودہی و شونداری نا راز تخوک ءِ۔ اوپارے کہ حکومت پاکستان تعلیم نا نظام ءِ گچین و ورناتے واکدار کننگ کن بڑزکو تعلیم و مہارت آتا مون آ دننگ آ چندی پروگرام تا کمک اٹ خصوصی چکار کننگ ءِ، داپروگرام تیٹی بڑزکو تعلیم کن توسیع شدہ وظیفہ، میرٹ نا بنداو آ مالی کمکاری و وزیراعظم لیپ ٹاپ اسکیم اوار ءِ۔ دا پروگرام تا مسخت طالب علم آتے ڈیجیٹل وسیلہ غاتسکان رسینگ، پٹ وپولی لائخی ٹی ودکی، و جہانی کہول انا علم و زرگزران تون ہم گرنچ مننگ نا وارخواہی فراوان کننگ ءِ۔ وزیراعظم پارے کہ غٹ تپہ غاتون وابستہ ورناتے واکدار کننگ نا حکمت عملی نا اسہ اہم پلو فنی و کسبی تعلیم و تربیت نا مون آ دننگ ءِ تانکہ کسبکاری و مہارت قومی گرج و جہانی وارخواہی تا عین رداٹ مرے۔ او پارے کہ وزیراعظم یوتھ اسکلز ڈویلپمنٹ پروگرام نا رداٹ نیشنل ووکیشنل اینڈ ٹیکنیکل ٹریننگ کمیشن نا کمک اٹ مچ آملک اٹی گچین وحسب ضرورت تربیت نا چندی گام گیج کننگ انگ ءِ۔ داگام گیج آتیٹی مصنوعی ذہانت ، روبوٹکس، آٹومیشن و پوسکن آ ٹیکنالوجی کون آ مون آ بروک بشخ آتیٹی مہارت آتا تربیت اوار ءِ، قومی کہول آ کسبکاری کن گام گیج آتا کمک اٹ مدرسہ غاتا ورناتے ہم قومی نظام اٹی اوار کننگ انگ ءِ تانکہ او باوقار روزگار و کاروباری وارخواہی تیان فائدہ ہر فسا راج اٹ مثبت کڑد ادا کیر وخت اس کہ زالبول آتیکن خاص پروگرام تا کمک اٹ تکنیکی، ڈیجیٹل و اُرائی بنداو تیا مہارت آتے مون آ دننگ انگ ءِ تانکہ زالبول آتا زرگزرانی شمولیت و زرگزرانی خودانحصاری ءِ سوگوی ملے۔ وزیراعظم پارے کہ لمہ وباوہ و سول سوسائٹی آن خواست کینہ کہ ببو اواری اٹ ورناو بروک آ چین اکن ہندن ءُ تعلیمی چاگڑد اسے جوڑ کین ہرا آب اٹ نظریہ وفکر، غٹ تپہ غاتا شمولیت ، خواری نا عظمت، علم وپٹ وپول نا پوسکن آ خواست و مچ آ وئی ہیل کننگ ناجوزہ ءِ مون آ دے و داعزم ءِ پوسکن کین کہ ورناتا روشنا آخبت ءِ تعلیم وکسب ومہارت نا نظام نا محور جوڑ کینہ و اسہ ہندن ءُ تعلیمی نظام اس جوڑ کینہ ہرا ہر بندغ نا لائخی تے مون آ دننگ ، بریبری ءِ مون آ دے و بروک آ چین تے امن و سوگوی، شونداری و شونہالی نا مزل نا کنڈآپاکستان نا سرکڑدہ ئی کن تیار کے۔