بڑزکو تعلیم اسکان رسینگ، حقدار طالب علم آتا امداد و ٹیکنالوجی اسکان گچین رسینگ کون آ گام گیج ورناتے عملی زرگزران اٹی تینا کڑد ءِ ادا کننگ اٹ کمک تننگ ءِ، صدر آصف علی زرداری نا جہانی یوم تعلیم آ کلہو

اسلام آباد۔ 24 جنوری (اے پی پی) صدر مملکت آصف علی زرداری پارینے کہ پاکستان نا آخبت براہ راست اونا ورنا چین آتون گنڈوک ءِ، بڑزکو تعلیم اسکان رسینگ، حقدار طالب علم آتا امداد و ٹیکنالوجی اسکان گچین رسینگ کون آ گام گیج ورناتے عملی زرگزران اٹی تینا کڑد ءِ ادا کننگ اٹ کمک تننگ ءِ۔ ایوان صدر نا میڈیا ونگ انا رداٹ صدر مملکت داخیال آتا درشانی ءِ جہانی یوم تعلیم نا وخت آ تینا کلہو اٹی کرے ہرا ہفتہ غا اڈتننگ انگ ءِ۔ اوجہانی یوم تعلیم نا وخت آ پاکستان نا الس خاص وڑاٹ طالب علم، استاد، لمہ و باوہ ، اسکالرز و تعلیم نا مون آ دننگ تون اوار گنڈوک غٹ بندغ آتے مبارکبادی پیش کرے و پارے کہ داسال انا سرحال‘‘ تعلیم نا تخلیق اٹی ورناتا واک‘‘ داہیت آ زور شاغک کہ ورناتے بیرہ طالب علم آخا بلکن مفکر، موجد و زموار شاری اسے نا وڑاٹ ہم امنا کننگے  ہرافتاخیالات تعلیمی نظام و جمہوری راج آتے سوگو کیک۔ صدر مملکت پارے کہ پاکستان نا آخبت براہ راست اونا ورناچین آتون گنڈوک ءِ ننا ملک انا دودوربیدہ ئی میرات گیشتر و ورناآبادی زیات ءِ، داڑکن ننے داہیت ءِ پک کننگے کہ تعلیم ورناتیٹی نئے بیرہ تجسس، قابلیت و کڑد ءِ مون آ دے بلکن دا اوفتا تنقیدی سوچ، اخلاقی عمل و راج اٹی مثبت کڑد ءِ ادا کننگ نا قابل ہم جوڑ کے۔ آئین نا آرٹیکل 25 اے انا رداٹ مفت و المی تعلیم نا ضمانت دابنداوی حق اکن ننا اسیجائی عزم انا ڈیک ءِ۔ اوپارے کہ ترندی اٹ بدل مروک و تین پہ تینی رابطہ غاتیا تالان جہانی منظر نامہ ٹی تعلیم ءِ عملی مہارت، پوسکن علم، اخلاقی قدر و تنوع نا شرف ءِ بایدے یکجا کننگے۔ صدر مملکت پارے کہ بڑزکو تعلیم ءِ گچین جوڑ کننگ، پٹ وپول و ایجاد ءِ مون آدننگ و ڈیجیٹل تعلیم اٹی ودکی نا کوشست آک دا بدل مروک آ سوچ انا عکاسی ءِ کیرہ۔ اوپارے کہ تکنیکی و کسبی تعلیم و تربیت ورناتے روزگار نا قابل مہارت آتیان شپ کننگ و خواری نا عظمت ءِ باور کرفنگ اٹ اہم کڑد ادا کیک۔ صدر آصف علی زرداری پارے کہ مہارت آتا مون آ دننگ کن کروک آ قومی گام گیج ورناتے مون آ بروک ٹیکنالوجی تیان فائدہ ہرفنگ کن تیار کننگ ءِ و تربیت ءِ جہانی آب اتون ہم گرنچ کننگ تون اوار اوار اوفتے روزگار، کاروبار و جہانی کہول آ شمولیت نا وارخواہی فراوان کننگ ءِ۔ اوپارے کہ زالبول، مدرسہ غاتا طالب علم و پدسلوک آ علاقہ غاتا ورناتسکان وارخواہی تے ودفوک آ گام گیج راجی ہم گرنچی ءِ مون آدننگ تون اوار اوار داہیت ءِ پک کیک کہ شونداری نا بھرم آک غٹ ءِ اسہ وڑ دوئی مریر۔ صدر مملکت پارے کہ تعلیم ہمو وخت آ شون ہلیک ہراتم خاہوت، راج، استاد، ادارہ و نجی بشخ اواری اٹ کاریم کیرہ و ہراتم طالب علم تینٹ تینا علمی چاگڑدءِ جوڑ کننگ اٹ حقی وڑاٹ اوار مریر۔ اوپارے کہ اینو نادے ، ای غٹ تعلقدار بندغ و ادارہ غاتیان دااومیت ءِ تخیوہ کہ او تعلیم ءِ قومی اولیت نا وڑاٹ امنا کیرہ و تینا ورناتے اسہ کسبکار، روشنا خیال و سوگو پاکستان اسے نا جوڑ کننگ اٹ شریدار جوڑ کیرہ۔ صدر مملکت دعاکرے کہ ننا اجتماعی کوشست آک بروک آ چین تیکن امن، شونداری و شونہالی نا ضامن مریر۔