پاکستان تون اوار 8 مسلمان ملک آتے غزہ امن بورڈ انا بشخ جوڑ مرسا فلسطینی الس نا حق و امن کن کڑد ادا کننگ نا موقع ملانے، بنجائی وزیر احسن اقبال

اسلام آباد۔ 23 جنوری (اے پی پی) بنجائی وزیر ڈٹ بندی ، شونداری و اصلاحات احسن اقبال پارینے کہ پاکستان تون اوار 8 مسلمان ملک آتے موقع ملانے کہ او غزہ امن بورڈ انا بشخ جوڑ مرسا فلسطین نا الس نا حق و امن کن تینا کڑد ءِ ادا کیر۔ پاکستان نا اسرائیل نا بابت 1967والاہی موقف ءِ کہ او سفاک و ظالم ملک ءِ، نتن یاہو نا دُوک کودک و مظلوم فلسطینی تا دتر اٹ رنگی ءُ۔ برام کن 18 سال وئی تو ننا  و پین ہم اسلامی ملک آتیٹی نافذ ءِ انت او ملک آک ہم اسلام نا دنگ آن خارج ءُ؟ او جمعہ نادے آ ایوان اٹی مولانا فضل الرحمان نا اعتراضی ٹک آ گپ وتران کریکہ۔ بنجائی وزیر ڈٹ بندی ، شونداری و اصلاحات احسن اقبال پارے کہ پاکستان مسلم لیگ ن 28 مئی 1998ٹی امریکی صدر آ ٹیل فون  و مچ آ دنیا نا زور آن پد ہم ایٹمی دھماکہ کرسا پاکستان نا آجوئی و وتواجہی نا درور اس قائم کرے۔ پاکستان مسلم لیگ ن داوڑپاکستان نا لمہ ءِ و ملک انا دفاع سلامتی کن نن کس اسے نا درس انا محتاج افن، انتئے کہ نن پاکستان نا آجوئی و وتواجہی نا محافظ اُن۔ پاکستان نا بھاگ دوڑ پاکستان مسلم لیگ ن نا دوٹی مرسا ہچ ءُ خطرہ اس اف۔کس اس خراب انگا نظر اٹ پاکستان نا کنڈآ ہُننگ کپک، معرکہ حق اونا شاہدی ءِ۔ خرا ب انگا خن تے ہی کشنہ، ہنداسوب آ ن کس اس ننے لغوری و لاپرواہی نا طنز ءِ خلنگ کپک۔ اوپارے کہ آرام دہ و یخ انگا جاگہ غاتیا تولسا تقریر کروک آتے فلسطینی تیا کروک آ ظلم ،  کشت وخون نا درک اف، پاکستان تون اوار عالم اسلام نا 8 ملک آک داکشت وخون ءِ توننگ کن اسہ گام اس ہرفینو، اگہ خوانخواستہ پاکستان غزہ امن بورڈ انا بشخ جوڑ متوکہ تو ہندا اپوزیشن ننا برخلاف تقریر کریکہ کہ پاکستان تنیا رہینگانے، سفارتکاری بے سہب مسنے۔ اوپارے کہ پاکستان ءِ غزہ امن بورڈ اسہ سینٹرل سٹیج اسے نا وڑاٹ ملادا ننا سرسہب سفارتکاری نا نتیجہ ءِ داڑآ بایدے خوشی کننگے۔ اوپارے کہ داڑے غزہ امن بورڈ اٹی اوار مننگ ءِ غلط پاروک آک پار کہ انت سعودی عرب، ترکیہ، یواے ای، بحرین، جارڈرن، کویت و مراکش ننا سنگت و مسلمان ملک افس ہرا غزہ امن بورڈ انا بشخ ءُ۔ اوپارے کہ پاکستان مسلم لیگ ن نا ہر کارندہ اسلام نا محافظ ءِ ہچ ءُ دن ءُ کاریم یا گام اس ہرفپنہ ہرا اللہ تعالیٰ و رسول صلی اللہ علیہ و آلہ وسلم نا ناراضگی نا سوب جوڑ مرے۔ احسن اقبال پارے کہ برام کن 18 سال وئی نا کانود تو نناایلو اسلامی ملک آتیٹی ہم نافذ ءِ انت او ملک آک ہم اسلام نا دنگ آن خارج ءُ۔