حکومت برآمدکروک آتا حق آتا رکھ اکن سنجیدہ گام گیج کننگ اٹی ءِ، خواجہ محمد آصف

سیالکوٹ۔ 23 جنوری (اے پی پی) بنجائی وزیر دفاع خواجہ محمد آصف پارینے کہ حکومت برآمد کروک آتا حق آتا رکھ اکن سنجیدہ گام گیج کننگ اٹی ءِ۔ داخیال آتا درشانی ءِ او سیالکوٹ چیمبرآف کامرس اینڈ انڈسٹری نا آڈیٹوریم اٹی بزنس کمیونٹی نا دیوان آن تران کرساکرے۔ دیوان اٹی صوبائی اسمبلی نا باسک چوہدری فیصل اکرم، گروپ لیڈر سیالکوٹ بزنس کمیونٹی ریاض الدین شیخ، صدر سیالکوٹ چیمبر آف کامرس اینڈ انڈسٹری سید احتشام مظہر، سینئر نائب صدر محمد مراد ارشد ، نائب صدر سلمان شیخ، مسکوہی صدر آک، مسکوہی عہدیدار آک، چندی ایسوسی ایشن تا نمائندہ غاک و بزنس کمیونٹی نا باسک آک بشخ ہلکر۔ بنجائی وزیر دفاع چیمبر نا عہدیدار آتون تین پہ تینی است خواہی نا امور آ سرجمی اٹ گپ وتران کرے۔ داوخت آ خواجہ محمد آصف پارے کہ ایکسپورٹ ڈیویلپمنٹ فنڈ برآمد کروک آتا تینا پیسہ ءِ، ہرا اوفتا راجی آسودہی آ بایدے خڑچ مرے، حکومت نا داڑآ ہچءُ حق اس اف۔ اوپارے کہ پاکستان مسلم لیگ (ن) تینا ہردور حکومت اٹی خلوص نیت تون الس نا خذمت ءِ کرے و الس ءِ بنداوی آسراتی فراوان کننگ کن میگا ڈٹ آتا بناءِ کرے۔ اونا پاننگ ئس کہ ہراتم ہم مسلم لیگ (ن) اقتدار اٹی بس، ملک شون ہلک۔ سیالکوٹ اٹی برجا و سلاہ ئی شونداری ڈٹ آتیا ہیت کرسا بنجائی وزیر دفاع پارے کہ تدوک آ اِرادے اٹی سیالکوٹ لاری اڈہ شار آن پیشن گدریفنگ کن فنڈز دوئی مسنے، ہراڑآن شار انا تہہ ٹی ٹریفک نا ویل ایسر مریک۔ اوپارے کہ علامہ اقبال لائبریری نا تزئین و آرائش اسہ سد ملین روپئی نا خڑچ آن کننگ انگ ءِ و اودے ڈیجیٹل آسراتی تیان شپ کرسا پوسکن آ لائبریری ٹی بدل کننگک۔ اوپارے کہ مستین اٹ دالائبریری مسلم لیگ نا لائبریری ئس ہرا وخت اتون ضلعی حکومت نا بست وبند اٹی بس۔ وخت اس کہ اوٹی 80 آن 90 درسد بشخ اونا باوہ ایماندار خواجہ محمد صفدر نا ءِ و اونا ذاتی کتاب آک ہم لائبریری ٹی ساڑی ءُ۔ خواجہ محمد آصف پارے کہ او کوشست کیک کہ علامہ اقبال لائبریری ءِ شار اٹی جوڑ مروک آ پارک انا بشخ جوڑ کننگے ۔ اوپارے کہ شاعر مشرق علامہ اقبال برصغیر نا مسلمان و داملک انا عظیم محسن ئس و مدام محسن نا وڑاٹ یات تخنگک۔ اوپارے کہ شار انا نیام اٹ واقع علامہ اقبال نا اُراغا ہنوک آ سڑک ءِ اول سرآن تفنگک۔ اوپارے کہ لاہور نا طرز آ سیالکوٹ نا شار اٹی سڑک آتے ہم تفنگک، بجلی نا تازہ ڈغار نا تہہ ٹی گدریفنگک و بے گرج پارکنگ آتے چٹفنگک، ہراڑآن شار اٹی رش کم مریک۔ اومستی پارے کہ ریلوائی روڈ سیالکوٹ آ چار کنال رقبہ غا پارکنگ پلازہ جوڑ کننگک تانکہ ٹریفک نا دباؤ ٹی کمتی اتنگ مرے۔ بنجائی وزیر دفاع پارے کہ 16.49 کلومیٹر رنگ روڈ انا اولیکو ریسہ ٹی سمبڑیال، ڈسکہ و ایمن آباد روڈ ءِ اوار کننگک وخت اس کہ ایلوریسہ ٹی ایمن آباد آن پسرور اسکان رنگ روڈ ءِ تفنگک، ہرا نیم دائرہ نا دروشم اٹی مریک۔ اوپارے کہ دا ڈٹ آتا فنڈز دستیابءِ ، اینو منظوری ءِ تننگ انگ ءِ و بروک آ اِرا تُو اٹی ٹینڈر منظور مریک، وخت اس کہ پوروی نا ہدف سال 2029 مقرر کننگانے۔ ہندا وڑ سیالکوٹ ۔ کھاریاں موٹروے ءِ ہم 2029 اسکان روات اسکان پورو کننگ نا ہدف ءِ۔ اوپارےکہ علامہ اقبال میموریل ٹیچنگ ہسپتال سیالکوٹ اٹی 700 کٹ آتا ہسپتال نا منظوریءِ ہم تننگانے۔ بنجائی وزیر دفاع دا عزم انا درشانیءِ کرے کہ شار آن تجاوزات آتے چٹفنگک۔