غزہ پیس بورڈ انا جوڑ کننگ نا سلاہ جہانی سفارتی حلقہ غاتیٹی چکار نا مرکز جوڑ مسنے، چیئرمین قائمہ کمیٹی دفاعی پیداوار سینیٹر محمد عبدالقادر

کوئٹہ۔ 23 جنوری (اے پی پی) چیئرمین قائمہ کمیٹی دفاعی پیداوار سینیٹر محمد عبدالقادر پارینے کہ غزہ ٹی برجا بھسکار جنگ انا چٹفنگ و آخبتی امن کن ساڑی آ دے تیٹی غزہ پیس بورڈ انا جوڑ کننگ نا سلاہ جہانی سفارتی حلقہ غاتیٹی چکار نا مرکز جوڑ مسنے دا سلاہ ئی بورڈ انا مسخت نئے بیرہ دمدستی جنگ بندی ءِ پک کننگ ءِ بلکن انسانی امداد، پوسکن تفنگ و فلسطینی الس نا سیاسی حق انا رکھ اکن اسہ مربوط فریم ورک اس تیار کننگ ہم ارے ، ہندن ءُ وخت اسے ٹی ہراتم ڈیہہ شدید نزوری نا گواچی ءِ، جہانی و نسبتا متوازن پلیٹ فارم اسے نا گرج مہالو آن زیات ودانے دارداٹ پاکستان نا شمولیت ءِ اسہ اہم و علامتی پیش رفت اسے نا وڑاٹ ہُننگ انگ ءِ ، پاکستان بھلو وخت اسے آن فلسطینی کاز انا آخبتی، پیدوار و غیرمشروط مخ تف مسنے و او اقوام متحدہ تون اوار غٹ جہانی فورم تیا فلسطینی الس نا حق خودارادیت نا مخ تفی ءِ کرینے۔ داڑے جاری مروک اسہ بیان اسے ٹی چیئرمین قائمہ کمیٹی دفاعی پیداوار سینیٹر محمد عبدالقادر پارے کہ پاکستان نا شمولیت غزہ پیس بورڈ ءِ اخلاقی ساکھ، مسلم دنیا نا نمائندگی و سفارتی توازن فراوان کننگ کیک، خاص وڑاٹ ہندن ءُ چاگڑد اسے ٹی ہراڑے کیہی بھلا واکدار آک جانبداری نا دوبہ غاتا زداٹی ءُ ولے، دابورڈ انا سرسہبی نا گمان کیہی عوامل آتون مشروط ءِ غٹ آن بھلا اڑاند واک انا عدم توازن، اسرائیل و اونا سیوتی تا رویہ، و زمینی حقائق آک ءُ اگہ بورڈ بیرہ اسہ علامتی فورم اس جوڑمرسا رہینگا و اونا فیصلہ غاتیا عملدرآمد کن گچین زور انانظام اس جوڑ کننگتو تو اونا افادیت محدود سلک ، ایلو کنڈآ، اگہ پاکستان کون آ ملک آک فعال سفارتی کڑد ادا کیر، علاقائی واکدار آتے پت اٹی ہلنگے و انسانی بنداو تیا امنائی لائحہ عمل اس  تینا کننگے تو دا بورڈ غزہ ٹی پائیدار امن نا کنڈآ اسہ سنجیدہ گام اس پک مننگ کیک۔