چیئرمین سینیٹ سید یوسف رضاگیلانی گلوبل مسلم بزنس فورم نا اعزازی سرپرست مقرر

اسلام آباد۔ 23 جنوری (اے پی پی) چیئرمین سینیٹ سید یوسف رضاگیلانی ءِ اونا خذمت وکوشست آتے مون آ تخسا گلوبل مسلم بزنس فورم (جی ایم بی ایف) نا اعزازی سرپرست مقرر کننگانے۔ سینیٹ سیکرٹریٹ آن جاری بیان نا رداٹ دا اعزاز اودے دا تاریخی سرسہبی نا منہ ہی تُو پد دوئی مسنے ہراتم او بین الپارلیمانی اسپیکرز کانفرنس (آئی ایس سی) نا بانی چیئرمین نا حیثیت اٹ پاکستان اٹی اسہ ریکارڈ ساز جہانی سروکی دیوان نا مہمانداری ءِ کرے ہراٹی دنیا نا 45 ملک آتا پارلیمان تا اسپیکرز و بڑزکو کہولی ڈل آک بشخ ہلکر۔ چیئرمین سینیٹ سید یوسف رضاگیلانی ءِ باضابطہ وڑاٹ گلوبل مسلم بزنس فورم نا اعزازی سرپرست جوڑ مننگ نا سلہ خلنگانے۔ دا فورم اسہ گچین جہانی پلیٹ فارم ءِ ہرا مسلم دنیا ٹی زموارانہ اقتصادی سرکڑدہ، تین پہ تینی کمکاری و پائیدار شونداری نا مون آ دننگ کن لگوک ءِ۔ دا پنداری چیئرمین سید یوسف رضاگیلانی نا بطور سینئر سیاستدان ، پارلیمنٹ نا باسک و آئینی حکمرانی و علاقائی کمکاری نا سوگو مخ تف نا وڑاٹ ودوک آ جہانی شناخت نا عکاسی ءِ کیک۔ پاکستان نامسکوہی وزیراعظم سید یوسف رضاگیلانی داوخت آ سینیٹ آف پاکستان نا چیئرمین نا حیثیت اٹ خذمت سرتننگ ءِ ہراڑے او کانود سازی نا چرجوئی نا چاروکی، سیاسی ہم گرنچی نا مون آ دننگ و اسہ پیچیدہ قومی و علاقائی چاگڑد اسے ٹی پارلیمانی قدر انا رکھ انا زمواری تے پورو کننگ ءِ۔اونا دہائی تیا تالان السی کیریئر طرز حکمرانی نا چیلنج، زرگزرانی شونداری و جمہوری ادارہ غاتا سوگوی تون گنڈنگ ءِ۔ جہانی کہول آ ہم چیئرمین سید یوسف رضاگیلانی اسہ نمان پارلیمانی راہشون اسے نا وڑاٹ مون آبسنے۔ 2025ء ٹی اودے بین الپارلیمانی اسپیکرز کانفرنس (آئی ایس سی) نا بانی چیئرمین مقرر کننگا ہرا مچ آ دنیانا پارلیمانی سرکڑدہ غاتا نیام اٹ گپ و تران و کمکاری ءِ مون آ دننگ کن جوڑ کروک آ اسہ پوسکن ءُ جہانی فورم اسے۔ آئی ایس سی نا جوڑ کننگ نا بیرہ چار تُو آن پد چیئرمین سینیٹ سید یوسف رضاگیلانی نا کماشی ٹی پاکستان اٹی اولیکو وار آئی ایس سی کانفرنس اڈ ہلک ہراٹی 45 ملک آتا پارلیمانی اسپیکرز و 117 بڑزکو کہولی مندوبین آک بشخ ہلکر۔ داکانفرنس پاکستان ءِ پارلیمانی سفارتکاری نا اسہ گچین ءُ مرکز اسے نا وڑاٹ تالان کرے و چیئرمین سید یوسف رضاگیلانی نا ادارہ جاتی وژن ءِ عملی نتیجہ غاتیٹی شاغنگ نا لائخی ءِ نمان کرے۔ گلوبل مسلم بزنس فورم نا جوڑ کننگ سیاسی سرکڑدہ، کاروباری راہشون، دانشور و ہمو ادارہ غاتے یکجا کننگ کن جوڑ کننگانے ہرا شونداری، علاقائی کمکاری و مسلم زرگزران تیٹی مریس مدی سوگوی کن سنبرینگوک ءُ۔ دسمبر 2025 ء ٹی کوالالمپور اٹی اڈ ہلوک جی ایم بی ایف سروکی دیوان اٹی چیئرمین سید یوسف رضاگیلانی نا بشخ ہلنگ و خذمت آتااہم و بامعنی شریداری نا وڑاٹ ستاءِ کننگا ہراڑآن حکمرانی ، زرکاری نا پت و اقتصادی کمکاری نا بابت شرہ ءِ پوسکن ءُ جہت اس ملا۔ تینا تقرری آ گپ وتران کرسا چیئرمین سید یوسف رضاگیلانی پارے کہ اودے گلوبل مسلم بزنس فورم نا اعزازی سرپرست مقرر کننگ آ گمر محسوس مننگ ءِ۔ مسلم دنیا ٹی اقتصادی کمکاری و زموارانہ کماشی نا مون آ دننگ کن جی ایم بی ایف نا مشن بے کچ وخت آ و ستاکڑزک۔ سینیٹ نا چیئرمین نا حیثیت اٹ ای اوآئی سی ملک آتا نیام اٹ سوگو رابطہ، تین پہ تینی واپار نا مون آ دننگ و ٹیکنالوجی آتالان شونداری نا خواہندار اُٹ۔ جی ایم بی ایف کون آ گام گیج جدتءِ مون آدننگ کیک، پوسکن ءُ وارخواہی ودی کننگ کیک ونیزگاری نا چٹفنگ و موسمیاتی بدلی کون آ اسیجائی چیلنج آتون مون تننگ اٹ کمکار جوڑ مننگ کیک۔ اومستی پارے کہ او فورم نا گام گیج آتا پبی مخ تفی ءِ کیک و آخبت اٹ داڑکن پلیٹ فارم آ فعال کڑد ادا کرسا کیک تانکہ اسہ شونہال ، سوگو و باہم مربوط مسلم دنیا سے نا ٹہیفنگ اٹ تینا بشخ ءِ شاغنگ کے۔ چیئرمین سید یوسف رضاگیلانی نا بطور اعزازی سرپرست اونا ودوک آ جہانی اثرورسوخ نا چیدہ ءِ ہرا جہانی پارلیمانی و اقتصادی گپ وتران اٹی پاکستان نا کڑد ءِ پین سوگو کیک ۔ دا تقرری دا حقیقت نا ہم ڈیک ءِ کہ مسلم دنیا ٹی گچین وپائیدار اقتصادی کمکاری کن ہندن ءُ سرکڑدہ اس بے کچ المی ءِ ہرا تینا آزموندہ ، ادارہ جاتی فہم و شونداری نا پائیدار وژن آن شُپ مرے۔